پاینده ائدن مکتبِ قرآنی علیدور
عرش اوسته ویران،پرچم ایمانی علیدور
زهرایه قسم ، پنج تنون ، جانی علیدور
کیم ضِدّ علیدور ، بیزه قارداش باجی اولماز
مین یولدا گیده کعبه یه، اوندان حاجی اولماز
__
گون وصف ائلییَنمز جَلوات ازلیدن
آی واله اولار نورِ کمالات وَلیدن
عاجزدی قلملر یازالار مدحِ علیدن
کیم ایستسه گر منقبتیندن نظر آلسون!؟
زهرادن علی شاءنینی گیتسون خبر آلسون...
__
حیدر آدینا شیعه اولوبدی نیه حَسّاس؟
بلبل دئییر آدین،گول آچار باغِ گُلِ یاس
بیر عالی حکایت یازیرام،یاخشی قولاق آس
بیر گون گیچن ایّامیده اصحاب گیدوردی
بوبکر و عُمَر ، حیدریلن صحبت ائدوردی
___
صاق صولدا اولار ، دورمُوُشُوُدی حیدر آراده
باخ چشم بصیرتله دوروب گوهر آراده
زهرانین عزیزی،گُلِ پیغمبر آراده
یوز دوتدی عُمر حیدره، سیندیردی ئوز حَدّین
عرض ائتدی علی!!!! بس نیه کوتاهیدی قَدّین؟؟
___
ثانی دانیشوب سوزلرین از روی کنایه
اوخشاتدی او دَم،ئوزلرینی حرفِ لَنایه
یعنی،علی ، باخ، بیزده اولان قَدّ رَسایه
دای بیلمدی سلطاندی علی،شوکتی نِینیر..
گویلرده حکومت ائلیین،قامتی نِینیر...
___
بوبکر تمسخرله گولوب اولدی خَرامان
فکر ائتدیله حیدر اولاجاق خوار و پریشان
بیر لحظه ده گلدی دیله تا،ناطقِ قرآن
قلبینده او دَم ،فاطمه نین عطرینی آلدی
بوبکره باخاندا ،عمرین رنگی سارالدی
__
فرمایش ائدوب حیدر والانسبم من
اللّههَ ولی ، ذاتِ حَقَه، منتسبم من
عرشه یازیلوب مفخر نسلِ عربم من
نون ، قامتی ، کوتَهدی اَلِفدن ، وَ بجادی
نون اولماسا بُنیانِ (لَنا) عینِ فنادی
_
خلّاقِ اَزل حیدری مَحرَم یارادوبدی
زهرایه گوره عالمه ،خاتم یارادوبدی
زهرا و علیدن صورا ،آدم یارادوبدی
ئوز قدرتینی حَق، شَرف الناسه ویروبدی
خِلقَتده ، علی قامتین ، عباسه ویروبدی
- پنج شنبه
- 19
- مرداد
- 1402
- ساعت
- 0:21
- نوشته شده توسط
- یوسف اکبری
- شاعر:
-
بهلول حبیبی زنجانی
ارسال دیدگاه