قاشلارون طاقی ویرور روح مناجات منه
هاشمی خالون اولوب قبلۀ حاجات منه
.
حیف سن یوسفه تشبیه ایلیم طلعتوی
مین زلیخا ده چاتا عشقیده هیهات منه
.
بیر خس بی سر و پایم ولی عشقونله خوشام
کعبۀ رویون اولوب گورنجه میقات منه
.
آقا جان بیر گجه قویسون قدمون گوزلریمه
بسدی عمروم بویی بو فخر و مباهات منه
.
گرقویام بیر گونی بو قاره یوزی درگهیوه
باش اَیَر کون و مکان، ارض و سماوات منه
.
من دیدیم ناره یانان ناله سیز اولماز اما
شمع یاندی بو سوزی ایلدی اثبات منه
.
منده یاندیم گوزلیم آتش هجرانونده
مرهم وصلیوی جان قیمتینه سات منه
.
ای صبا دوشسه یولون دلبریمون کویوندن
گتیر اول قاره تلین عطرینی سوغات منه
.
زاهدا بوشلا نصیحت ندی دیوانه ندی ؟!
من رضا عاشقی ام عالم اولوب مات منه
.
سوروشورسان نیه؟ اسرار خفا بابکدن
سرّی فاش ائتمه دیوب پیر خرابات منه
.
- دوشنبه
- 24
- تیر
- 1398
- ساعت
- 14:23
- نوشته شده توسط
- ابوالفضل عابدی پور
- شاعر:
-
حاج افشین بابک اردبیلی
ارسال دیدگاه