آیت عظمای ذات کبریا سن یاعلی
مظهرآئینۀ ایزد نما سن یاعلی
.
کیمدی اولسون زادگاهی قبلۀ اهل ولا
معنی اسمای حُسنای خدا سن یاعلی
.
ناطق قرآن سن قرآن سنی مدح ایلیوب
کیم دئیر الله و قرآندان جدا سن یاعلی
.
بی ولایت اهل قرآن اولماقون یوخ ارزشی
سالک راه حقه سن رهنما سن یا علی
.
نفس پیغمبر بویوردی شأنیوه قرآن سنون
یوخ نبّوت سنده امّا پیشوا سن یا علی
.
شأنیوه وارآیۀ تطهیر و نور و هل اتی
راز دارلیل اِسراء اِنّما سن یاعلی
.
سنسیز اولمازدی بتوله کفّوده همتا اولا
سن امام و همسرفخرالنسا سن یاعلی
.
غزوه لرده گوندوزی ایتدون عدویه لیل تار
سن فنون ورمز جنگه آشنا سن یاعلی
.
ضربتونله جنگ خندقده قیامت ایلدون
هر عبادتدندی افضل غم زُدا سن یاعلی
.
باب علم مصطفاسن یوخدی سنده حدّ ومرز
علم دانش بحرینه بی انتها سن یا علی
.
بحرعلمون قطره سیله عالمه ویردون صفا
آگه سرّ خفّیِ ما سوا سن یا علی
.
حُجّت حقدوربوعالم اهلینه اون بیر بالان
سن جمیع اولیایه مقتدا سن یا علی
.
مکتبونده پرورش تاپدی حسین و مجتبی
رهبر و استاد شاه کربلا سن یا علی
.
آلدی عباسون فراتی ایچمدی بیرجرعه سو
اورگدن درس مواسات و وفاسن یا علی
.
انس وجنّه سن آیردون راه حق و باطلی
سن عدالت اوسته دینه جان فداسن یاعلی
.
مشکله دوشسه احبّا ذره جه باک ایلمز
حل ایدرسن مشکلون مشکل گشاسن یا علی
.
یوخدی قدرت« عدلیده»احصا وصفون ایلسون
ذرّه دی یازدیقلاری بی انتها سن یا علی
ـــــــــــــــــ
رباعی :
نه غم وار حشر و نشر یوم دینه
او کی پیرو اولوب دین مبینه
قیامت عرصه سینده محزون اولماز
کیم اگسه باش امیر المؤمنینه
- سه شنبه
- 1
- مرداد
- 1398
- ساعت
- 10:26
- نوشته شده توسط
- ابوالفضل عابدی پور
- شاعر:
-
حاج اصغر فرشچی
ارسال دیدگاه