من اللهام ، که عالمی والا یاراتمیشام
اولدوزلاری ، گونی ، آیی زیبا یاراتمیشام
.
خلق ایلییب نبات و جماداتی بیر به بیر
بیر یرده جمع ائدیب صورا دنیا یاراتمیشام
.
خلق ایلییب نه قدری باخیب اولمادیم رضا
اوندان ئوتوردی آدم و حوا یاراتمیشام
.
امر ایله دیم ملائکه ، سجده ائدون بونا
من چون بونی تمام خلقته اُولا یاراتمیشام
.
اما منیم بو عالمه بیر خلقتیم گلیب
مست اولموشام او گونَّن اونی تا یاراتمیشام
.
شاعر نجه یازار یازار آخر اولار کتاب!
سویلر باخون گورون نه غزلها یاراتمیشام
.
منده ید خداییمیله بیرجه بیر غزل
دنیا آدیندا نظمه چکیب یا، یاراتمیشام
.
اَوَّل قلم گوتورماق همین یازمیشام،علی
شاه بیتیمه باخان دئدی غوغا یاراتمیشام
.
حیدر آدیندا بیر بشری وئرمیشم سیزه
دنیا یوزینده آیریجا دنیا یاراتمیشام
.
دوزدور ازل سوزوم بودی که کل خلقتی
بر پایۀ محبت زهرا یاراتمیشام
.
اما گورون علی ده جلالتده کیمدی که
پیغمبرین قیزین اونا همتا یاراتمیشام
.
دنیاده من علی نی ئوز ایستکلیمه گوره
یعنی محمد رسولیمه همپا یاراتمیشام
.
تنها علی جلالتینه بس ، که کعبه نی
میلادگاه حضرت آقا یاراتمیشام
.
دنیاده هر نه گوزه لیق که وار ییغیب
تنها علی یوزینده دی یکجا یاراتمیشام
.
میندَن بیری جلالتی توصیف اولوب هله
بو خلقتیمله، خلقه معما یاراتمیشام
.
بسدیر ثبات قدرت الله لیقیما که
حیدر تکین بو عالمه مولا یاراتمیشام
.
بیر قطره آتمیشام گوزونون یاشینی یره
دنیا یوزینده سیزلره دریا یاراتمیشام
.
بیر ثانیه ، اوروج ، قوری لبلره گوره
تشبیه ائدیب او لبلره صحرا یاراتمیشام
.
گلمز بیانه وصفی منیم تک بو خلقتین
چون حیدری ئوزوم کیمی یکتا یاراتمیشام
.
” هاتف ” ندور که وصف ائده اوصاف حیدری؟
وصفین ئوزوم جهانه هویدا یاراتمیشام
- پنج شنبه
- 3
- مرداد
- 1398
- ساعت
- 11:9
- نوشته شده توسط
- ابوالفضل عابدی پور
- شاعر:
-
سعید حضرتی (هاتف)
ارسال دیدگاه