علی آغلار گوره بولمم،او چشم شوخ و شهلانی
گوتوردم سندن ال گئت آغلاما آغلاتما لیلانی
.
دوزلموش صف به صف خنجر الینده لشگر اعدا
قدم قوی عرصه میدانه هرگز ایلمه پروا
اوزون راضی آتان راضی رضادور هم آنان لیلا
مخضب گورماقا قانیله بو زلف مطرانی
.
بولورسن بسته دور کونلوم او گیسوی پریشانه
گتور بیرده وروم شانه او زلف عنبر افشانه
چکوم سرمه گوزیوه ، گوندریم بو قانلی میدانه
باخان احسن دیسون نقاشیوه ای یوسف ثانی
.
علی زخم خدنگیله وجودین دولسا خرسندم
یوزون زلفون گوزون قانیله الوان اولسا خرسندم
سموم ظلمله گل عارضون گر سولسا خرسندم
داخی سندن صورا لیلا نئدر سیر گلستانی
.
بو مهر و بو محبتله نه نوعی ال اوزوم سندن
اولونجه سیر ائدم گوز قاشیوه دویماز گوزوم سندن
فلک دوندرمسه دونمز علی هرگز یوزوم سندن
باشون آردیجا عشقین گزدیرر بو خانه ویرانی
.
نه قدری عندلیبه صعبیدور گلشندن آیرلماق
منه یوز ائله مشکلدور عزیزیم سندن آیریلماق
اولومدن سختیدور لیلایه آخر سندن آیریلماق
اودور اوز مرگیمه ایندی رضایم من علی جانی
.
بئله بولمه غم هجرون علی ائتمز منه تاثیر
نه چاره ائیلیوم من بینوا تقدیره یوخ تدبیر
ائدوب لوح قضا بو نوع لوح قسمته تحریر
دولانسون باش آچوخ مجنون صفت لیلا بیابانی
.
سنه حاشا دئیم میدانه گتمه نوجوانیم گئت
گوزوم نوری عزیزیم ای منیم آرام جانیم گئت
ولیکن بیرجه دور من باشیوه بیرده دولانیم گئت
بلا گردان ایله اوز باشیوه بو دیده گریانی
.
روادور نوکرون «عاصی» گونی گوندن غمه دولسون
او قدری یالواروب،سندن ده آخر نا امید اولسون
آناسی ناله ایتسون فرقتینده زلفونی یولسون
اوغول ذکر ایلیوب عرشه اوجالسون آه و افعانی
.
- شنبه
- 5
- مرداد
- 1398
- ساعت
- 14:31
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه