ای شرع مصطفایه اولان هادی و دلیل
وی جنّت ایچره صاحب یَنبوع سلسبیل
.
طوطیّ طبعین آچدی زبان باشلادی نوا
نام ولیّ مطلقی ورد ایتدی برملا
بیر شور باشه سال منه ویر باده ساقیا
اهل محبّته می معهودی قیل سبیل
.
ساقی گتور او می دن ایدوب اهل عشقی مست
روز الست هر کیم ایچوب اولدی حق پرست
منکرلرین بو می ایلدی قدرتین شکست
قرآندن واریمدی الیمده منیم دلیل
.
مقصود می دن اولدی بیزه مهر لافتی
اولموش نزول شانینه آیات هَل اَتی
رونق علی آدیله تاپوب عرش کبریا
مدحین ایدوبدی گویده سرافیل و جبرئیل
.
سنسن وصیّ احمد مختار یا علی
دین محمّدی ایدن اظهار یا علی
هر کس ولایتون ایده انکار یا علی
اولسون گوروم جهاندا او کس دائماً ذلیل
.
هر کس علی ولایتینه قائل اولماسا
مهر ولیّ مطلقه گر مایل اولماسا
باب کرمده حشره کیمی سائل اولماسا
اولماز اونا جزا گونی شاهِ ولا کفیل
.
میر عرب امیر عجم شاه اولیا
زینت تاپوب سنیله شها جنّت السّرا
ای ابن عمّ و یاور سلطان انبیا
سنسن قسیم نار و بهشت حق جلیل
.
بی مثل خلق ایدوب سنی خلّاق لایزال
یوخ ماسِوالله ایچره سنه یا علی مثال
آتدی خلیلی آتشه نمرود بدسگال
سنلن نجات تاپدی او گون ناردن خلیل
.
نوروندن اخذ نور ایلیوب ماه و آفتاب
لاسیف و لافتی سنه حقدن یتوب خطاب
سرگشته ام بو بابیده چون کشتی و حباب
بولمم بو شانیلن نه چون اوغلون اولوب قتیل
.
اول دم که کربلاده ظهور ایلیوب نشور
گویا فنا جهاندا سرافیل ووردی صور
اعدای دین عرصه ده ازبس تاپوب وفور
اولدی شهید حسینیله بیر مجمعی قتیل
.
یکسر آپاردی غارته اعدا جلالینی
شمر ایتدی دستگیر پیمبر عیالینی
زین العبادین آرتیروب اعدا ملالینی
میندی جهازسیز دوه اول سیّد جلیل
.
گلشن سولوبدی گللری پابند خار اولوب
صیّاد کینه، صید حرم لر شکار اولوب
تا اهل بیتی جمله سی ناقه سوار اولوب
اول عمّه سینده ناقه سوار ایتدی اول علیل
.
فریاد و ناله صوتی گیچوب مهر و ماهیدن
شمر ایتمیوبدی شرم رسول الهیدن
سالدی اسیرلر یولونی قتلگاهیدن
زینب باخوبدی گوردی دوشوب خسرو بدیل
.
اولدی پیاده ناقه دن آرتوردی شور و شین
نالان باخوب او جسمه توکوب گوزدن اشک عین
قارداشینون او جسمینه عرض ایلدی، حسین
حددن آشوبدی محنتیم ای سرور جمیل
.
دفتر الونده توشه ی عقبادی «خازنا»
گوزلر دولوبدی اشکیله دریادی«خازنا»
تکلیف بو مصیبتین ایمادی«خازنا»
یاد مصیبت ایله توک اشکون چو رود نیل
- دوشنبه
- 7
- مرداد
- 1398
- ساعت
- 11:30
- نوشته شده توسط
- ابوالفضل عابدی پور
ارسال دیدگاه