قارداش بو نئجه یئردی ائله سرّینی اعلان
گل تک سارالان رنگوه زینب اولا قربان
.
.
آگاه ائله ای خسرو خوبان منی بیر سن
علت ندی سولدی گل ئوزون غصّه و غمدن
قیل زینبه گیزلین سؤزوی لطفیله روشن
گؤدوقجا جمالون اولورام زار و پریشان
.
.
آیا بو نئجه یئردی دلیم آهیله دولدی
صبریم تالانوب طاقت و تابیم هدر اولدی
حالون نیه قارداش پؤزولوبدی سنه نولدی
باخدوقجا ابوالفصله اولورسان بیله گریان
.
.
گاهی باخوسان قیزلارا حیران نیه قارداش
گاهی باخوسان اکبره گؤزدن توکوسن یاش
گه گؤز تیکیسن قاسمه باجون ئوله ای کاش
سرّین بو یئرین ایله بیان ایلمه پنهان
.
.
گاهی باخوسان اصغر شش ماهیه ساری
یوخ قلبوین آری گؤرورم صبر و قراری
گؤزیاشوی هر دم ائدوسن صورته جاری
اولدوقجا پریشان، ائدوسن قلبیمی شان شان
.
.
دستور وئروبسن ندن عبّاسیله اکبر
قورسونلا چوخور یئرده سراپرده نی یکسر
دؤندی اورگی قانه هامی آل پیمبر
اوج ایلیه آز قالدی گوه ناله و افغان
.
.
بو قورخولی چؤلده ائلمه مسکن اماندی
آثار غم و درد و محن بوردان عیاندی
امکانی اگر واردی گئدک غملی مکاندی
قورخوم بودی طوفانه دوشه بوردا جوانان
.
.
یاندی اورگیم شعله لنوب سوز و شرردن
چوخ قوخولویام روز ازلدن بو سفردن
خلاق جهان حفظ ائده بو یئرده خطردن
قلبیم بو یئره وارد اولاندان اولوب القان
.
.
امّا سنه قربان اولوم ای شاه ولایت
گر وعده گهوندی بو چؤل ای میر شهادت
تقدیره سنون تک وئررم منده رضایت
چونکی سنیلن باغلامیشام عهدیله پیمان
.
.
قارداش قانا سن باتسون اگر کرببلاده
منده گئدرم کوفه ایلن شامه جهاده
همراهیدی چونکی شهدایه اسراده
همراه اولاروق تا کی سرافراز اولا قرآن
.
.
غمکش اولا گر بیشه قلم بحر مُرکّب
عالم یازا حاشا یئتیشه باشه بو مطلب
دولدوردی گؤزون اشکیله زهرا قیزی زینب
حسرتله دئدی عشقوه قربانم حسین جان
- سه شنبه
- 15
- مرداد
- 1398
- ساعت
- 9:44
- نوشته شده توسط
- ابوالفضل عابدی پور
ارسال دیدگاه