گجه گوندوز دولانیب گلدی گنه ماه عزا
آغلیور عالم حسینه چکیلوب عرشه قرا
سالیب آفاقه او مولانین آدی شور و نوا
یغیشوب بیرده حسینیه لره اهل ولا
نوحه خوانلار اوخیولار آقاما مدح وثنا
نجه گون باشینه منظومه ی شمسی دولانار
دولانیب شمعین اودوندا نجه پروانه یانار
نجه بلبل باغی شیدالیقی چون یاخشی سانار
یار یولی اوسته نجه منتظر عاشق دایانار
ایلروک بیزده حسین آدی گلن یرده صفا
روضه سی نقل اولونان یرده بولود تک دولاروخ
یاده سالوق سوسوز اطفالینی گل تک سولاروق
بیز حسینیله خداونده مقرب اولاروخ
آلسا الله بوحسین آدینی بیزدن نولاروخ
بیزه اربابیمیزون درگهیدور باب رجا
اوج عزتدی اولاخ درگه مولایه غلام
دوزگون انسانلارا قسمتدی بوشایسته مقام
بو مقامه چاتان انساندا اولار نیک مرام
یازلوب درگه مولایه بوسوز ختمِ کلام
بورا اخلاصیله کیم گلسه اولار کامروا
بوحسینون گوزل آدیلا انیس اولسا بشر
نفس اماره باشین تیغِ محبتله کسر
ائول کسی کی ئورگی عشق ولایتدن اسر
بی ریا طاعتیله نامه ی اعمالی بزر
اولماز ائول نامه یازان کوفه لیلر مثلی دغا
نامیه قید الیوبلر کی آقا کوفیه گل
بیعته گور نه سنیلن هامی ایستور وِره اَل
قولیمیز بیردی بیزیم یوخدی ارامزدا جدل
ایلروک سن بویوران سوزلره السّاعه عمل
ایسته سن کوفیه گل خوش دی بو شهر ایچره هاوا
چای چیمنلر گل آچیب هر گورنی شاد الیور
نهریلردن سو آخور گولشنی آباد الیور
بوطبیعتده بشر خالیقینی یاد الیور
حیف اولا ظلم عدو کوفه ده بی داد الیور
چات بیزیم دادیمیزه ائول بیزه سلطان هدا
عترتیندن صورا بیر شاه کی اونا یوخدی نظیر
امر ایدیب حضرت مسلم گده ائول شهره سفیر
میندی اوز مرکبینه مسلمِ پاکیزه ضمیر
باشلاسین کوفیه جن راه بیابان و کویر
بیر وداع ایلدی حضرت ده اونی قیلدی دعا
ایلمیشدی غم هجرانی ئورکلرده کمین
یولا سالجاق اوبرازنده سفیرین شهِ دین
سوزولن گوز یاشلان اهل وعیال اولدی عجین
اونون آیرلماقی عترتدن او قدر اولدی چتین
دیدی دردانه بالاسی بیزی تک قویما بابا
طول عمرونده اولان رهبرینه یار صدیق
سنت خاتم مرسلده اِدن طی طریق
نچه گون یول گدیب ائول سالک هوشیار و دقیق
کوفیه یتجگ اولوب ملت او سرداره شفیق
امرینه چوخلار اولوب تابع بی چون وچرا
بیلیب اخباری اولان صدرِخلافتده یزید
کوفه نین والی سی نعمانی اِدیب عزل او پلید
یرینه قویدی عبیداللهِ مزدوری جدید
تاپشریب خاطی لریلن ایده برخورد شدید
فتنه کابینه سینی ایلدی تجدید بنا
مسجده گلدی عبیدالله اولوب خلقه خطیب
ووردی بیر مسلمه حامی اولان اشخاصه نهیب
قویدولار نامه یازانلار اونی تک اولدی غریب
غرق اولوب غصیه غربتده اومهمان نجیب
ویردی رخسارینه قلبینده اولان غصه جلا
گوردی عمال جفا شهره سالوبلار خفقان
یوخودی شهریده مأمور حکومتدن آمان
دولانوردی چولی گیزلین تاپا بیر امن مکان
بیر خانم طوعه آدیندا اولوب امداد رسان
شرح حالین سروشوب ایلدی احسان سو اونا
یاندی احوالینه دلسوز ئورگی چکدی بیر آه
مسلمه قصد ثوابیله صورا وردی پناه
ایوده بیر ناخلف اوغلی واریدی اهل گناه
او اوغول بیر ایشه باخدی کی بو ایش اولدی تباه
نقشه چکدی اِده والی اونا بیر تحفه عطا
جایزه فکری اونون قلبینه دولدوردی شرر
قویمادی اوندا قالا رحم و مروتدن اثر
قوش مثالی آچیب ائول مست هوا اوچماقا پر
ایوین اسرارین عبیداللهَ تز وردی خبر
بیلمدی اولماز او روبه صفت عهدینده وفا
چکیلیب اوخ آتان اشراریله اطرافه حصار
طوعه نین منزیلینه غیظیله بیر عده سوار
حمله ور اولدی اِده مسلمِ بی یاری شکار
طوعه گورجک بو قضایانی اولوب نی کیمی زار
دیدی الله نجه گور باشیمیزه گلدی بلا
طوعه نی ایتدی مخاطب بیر عدو نعره کشان
ده گوروم هاردا ایدوبسن بو فرارینی نهان
بوهیاهونی بیلیب مسلم پاکیزه روان
ایتدی نورانی اوزون تیره دل عماله عیان
دیدی ایو صاحیبینه بیلمیون ایذانی روا
طوعیه دوتدی یوزون شرمیله ائول نیک خصال
عرض قیلدی آنا جان مسلمی گل ایله حلال
ورسون الله سنه عقبا ده گوروم یاخشی جلال
چکدی تیغین شهدا بزمینه ائول مست وصال
تنگ اولوب مسلم أزادیه بو دار فنا
قهریلن خارج ادیب اِوده کی اشراری چوله
کیم جسور اولدی دوشوب لاشهُ مرداری چوله
شیر هیجادی چکوب عرصه ی پیکاری چوله
هیبتی سالدی اونون چوخ یلِ قداری چوله
دیدیلر سیفِ بنی هاشم اولوب جلوه نما
ذکر تکبیر اونی مستِ میِ ناب الیور
تشنه دور کیم جدله قانیله سیراب الیور
هر کمردن یاپوشور داملارا پرتاب الیور
تیغینون برقی اونی سرورِ مهتاب الیور
یری وار همتینه فخر الیه بدر دجا
نجه بیر شیر ایدر بیر سوری روباهی اسیر
رم ایدور دوروبرینده دولانان خرد و کبیر
دیدیلر یوخدی بو جنگاوره دنیاده نظیر
گتورون عرصه پیکارینه سرباز کثیر
اخذ ائدر تحفه بونا کیم وورا دعواده یارا
بیر زامان گوردی میِ عمری لبِ جامه چاتور
گل مثالی یورولان جسمینه مین خوار باتور
کوفه نون اهلی هامی دینینی دنیایه ساتور
ائول جنابین باشینا بامیدن اود یا داش آتور
سالدی فرصت اله سرکرده ی عمالِ جفا
ئولومه ویرمه دیدی مسلمه بوردا اوزوی
باشووه ضربه دگوب یکسر ایدیب قان یوزووی
آت یره تیغووی سیل یاره لنن یوز گوزووی
والینین یانینه گل منله گیدک ده سوزووی
ضامن اولام سنی مشگلدن ایدر والی رها
بویوروب مسلم اونا آچدون اکاذیبه دهان
سنوون اربابین علی آلینه دشمندی عیان
جانیمی آلماقا بیر لحظه منه ویرمز امان
دین یولوندا ولی قابیل دگول ایثار اولا جان
حاضرم مین یول ایدم جانیمی قرآنه فدا
گرگ عالم اولا بو طیب الانفاسه غلام
حیف اولا حق دانیشان لبلره گلموردی کلام
چون توخانمیشدی اوگل صورتینه تیغِ ظلام
قبلیه ساری حسینه ایلیوب عرض سلام
دیدی بحرانه دوشوب کوفه آقا گلمه بورا
بورا گلسن سنه آغلار بو چولون گل بوداغی
چول تیکانلیقدی اولار یاره رقیه ایاقی
سیلی دن نیلی اولار گل بالالارین یاناقی
تشنه لیکدن قوریار اکبروون دیل دداقی
قویولار قاسیمیوون اللرینه قانلی حنا
کوفیه گلمه سن ای ما خلقه شاه آقا
آتوون دردین اشیتدی بیر عمُر چاه آقا
ایلیلر سنیده غملره همراه آقا
قلبووه یاره دگر من چکرم آه اقا
یوخدی بو نامه یازوب دعوت ایدنلرده حیا
زندگی نامم اولوبدی آقا دیوان آدووا
منه منتدی ایدم جانیمی قربان آدووا
مین یول ئولسم گنه ده سسلیرم جان آدووا
کسیلن دیل دوداغی بیر اله مهمان آدووا
ذکر ایدنده آدووی خوشدی چیخا جانیم آقا
- شنبه
- 26
- مرداد
- 1398
- ساعت
- 11:1
- نوشته شده توسط
- ابوالفضل عابدی پور
- شاعر:
-
حسنعلی بالایی
ارسال دیدگاه