رحم ایله حارث سن بیزه قرآنه خاطر
ئولدورمه ناحق حضرت سبحانه خاطر
بیز مسلمون اطفالیوخ ای نامسلمان
گل قویما غربتده بیزی نالان و گریان
قیلماز روا بو ظلمی هیچ انسانه انسان
رحم ایله حارث سن بیزه قرآنه خاطر
بیر نچه مدت گوشه زنداندا قالدوخ
دوزدی رضای حضرت جانانی آلدوخ
اما او یرده گل کیمی سولدوخ سارالدوخ
رحم ایله حارث سن بیزه قرآنه خاطر
اولما رضا چکسون آنامیز درد و محنت
اطفالینه قالسون گوزی یولاردا حسرت
خوف ایله روز حشریدن ای نامروت
رحم ایله حارث سن بیزه قرآنه خاطر
مهر و محبتده گورورسن بی نصیبوخ
بیر کیمسه میز یوخدور بو غربتده غریبوخ
اما رسول اللهه منسبده قریبوخ
رحم ایله حارث سن بیزه قرآنه خاطر
ئولدورمه ناحق بیزلری بو ذلتیلن
تا اشکینی توکسون آنامیز حسرتیلن
آیا بیزه ظلم ایلوسن نه علتیلن
رحم ایله حارث سن بیزه قرآنه خاطر
« شیدا » بو غمده توک یوزه اشک روانون
عرشه اوجالسون ناله و آه و فغانون
بو مطلعی ائت روز و شب ورد زبانون
رحم ایله حارث سن بیزه قرآنه خاطر
- جمعه
- 8
- مرداد
- 1400
- ساعت
- 11:9
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه