ای حامیان قرآن قرآنه زیورم من
نوردوچشم زهرا فرزند حیدرم من
بازار معرفتده ارزنده گوهرم من
اسپهر منزلتده شمس منورم من
هارونه اگمرم باش موسی بن جعفرم من
.
.
من مظهرجمال خلاق بی بدیلم
هارونه ویرمرم باج سرمست سلسبیلم
من قدرت عصای موسی درون نیلم
فکر ایتمیون که ایندی بیچاره و ذلیلم
زنجیره یوخ اسیر زلف پیمبرم من
هارونه اگمرم باش موسی بن جعفرم من
.
.
فکر ایلیور که هارون بنده سالوبدی شیری
ظلم اهلی سیندیرانماز مردان حق پذیری
شیریندی حقه خاطر موسایه بو اسیری
حاشا قبول ایدم من هارون کیمی امیری
تاج سر ملائک جبریله شهپرم من
هارونه اگمرم باش موسی بن جعفرم من
.
.
سیرتده مصطفایم صولتده حیدرم من
حُسنِ حَسن یوزومده سلطان محشرم من
خون حسین رگیمده سجاده زیورم من
باقر کیمین علوم دنیایه ازبرم من
آلاله ای زباغ زهرای اطهر من
هارونه اگمرم باش موسی بن جعفرم من
.
.
من شهریار عشقم مأنوسم اهل رازه
خلوت یر آختاروردوم مشغول اولام نمازه
شکر خدا که چاتدوم آخر بو امتیازه
غبطه ایدر ملائک بو محفل نیازه
ئوز محبسیمده مست الله اکبر من
هارونه اگمرم باش موسی بن جعفرم من
.
.
دنیانی دوتسا شیطان من بنده خدایم
تفسیر بند بند قرآنه آشنایم
حقدن نه گلسه خوشدور تقدیریمه رضایم
دین اوسته چیخسا جانیم یوخدور منیم گلایم
فرزند بی بدیل فتاح خیبرم من
هارونه اگمرم باش موسی بن جعفرم من
.
.
دشمن خیال ایدورکه آواره قالموشام من
شیرم اگرچه پیرم اود جانه سالموشام من
درس حیا و صبری عمم دن آلموشام من
فخریم بودور که راه حقده قوجالموشام من
ظاهرده محبسیمده شهباز بی پرم من
هارونه اگمرم باش موسی بن جعفرم من
.
- چهارشنبه
- 30
- مرداد
- 1398
- ساعت
- 13:20
- نوشته شده توسط
- ابوالفضل عابدی پور
- شاعر:
-
مرتضی اسکندری
ارسال دیدگاه