دوشنده یاده بولوط تک توکور گوزوم یاشی
نظرده جلولنن غنچه تک علی باشی
.
نجه دیوم نجه باش قلبی یاندرور آهیم
او باشی گورسه قان آغلار اود ایچره ابراهیم
.
نجه دیوم نجه باش نوح گورسه رنگی سولی
اوباشدان اوتری عموسی سالوبدی یولدا قولی
.
نجه دیوم نجه باش ماه تک سالوب نوری
ایدوبدی صحن گلستان کلیم تک طوری
.
نجه دیوم نجه باش هر غمه شکیبادی
او باشه فخر ایلین حضرت مسیحادی
.
نجه دیوم نجه باش دیللره سالور شرری
خیالی باشدا ندور باشلیوب آغیر سفری
.
نجه دیوم نجه باش باخ اوباشدا اعجازه
یقین رسول کیمی قصد ایدوبدی معراجه
.
نجه دیوم نجه باش عفوایله امام زمان
ووراندا نیزیه باشی آخوبدی گوزلره قان
.
نجه دیوم نجه باش باشلار ایچره باش اولدی
نجه دیوم که او باشدا نشان داش اولدی
.
نجه دیوم نجه باش لمعه لمعه قان گلوری
قیامت اولسادا باش دردی قورتولان دگوری
.
نجه دیوم نجه باش نیزده دوشوب قاباقا
مباد آناسی سالا ناقه ده باشین اشاقا
.
نجه دیوم نجه باش نیزده فراز ایلوری
رباب چوخ چالشور دیندیره او ناز ایلوری
.
گورن دییور آناسی اولمیا بونون ایکاش
گورنمیوب وورولا نیزیه بیله بیر باش
.
کجاوه اوسته خانم دولدوراردی گوزلرینی
باخاندا باشه بو نوعی دییردی سوزلرینی
.
سحر ستاره سی تک تیز آخان بالام لایلای
آناسنا اوجا یردن باخان بالام لایلای
.
گچن گجه علی سنسیز بو قلبی داغلامشام
یانان چادردا بالا صبحه تک من آغلامشام
.
دیوم اورک سوزونی من سنه او مأوادن
یغوبدی عمه لرون اهل بیتی صحرادن
.
یغشدی عورت اوشاق گیتدی دیلده طاقتیمیز
سنوب سویون قوروقی باشلانوب قیامتیمیز
.
سوگلدی خیمه لره باخدی هامّی بیر بیرینه
سوایچمین سو ایچنلر قارشدی بیر بیرینه
.
دانشمسان آنان ئولسون نیه بالا مندن
الیوی باغلامشام عذر ایستورم سندن
.
بولوط کیمی من اوغول گوزیاشین یوزه اَلورم
یواش یه ری آنان ئولسون دالونجا من گلورم
.
دئمورم ایندی علی راه چاره می باغلا
دانیش منلیه سن الله هیچ اولماسا آغلا
.
بو سوزلری علی سالدیم من `اصغرین” باشنا (1)
که راه حقّی گیده ،گئتمیه یول اوز باشنا
.
دیوبدی «صادقییه» نظمه چکدی اشعاری
نه دلنشیندی بیچاره نین بو گفتاری
.
دوشنده یاده بولوط تک توکور گوزوم یاشی
نظرده جلولنن غنچه تک علی باشی
ــــــــــ
(1) این شعر بنا به درخواست دوست بسیار ارجمندم جناب آقای «اصغر »علیزاده سروده شده است .
- سه شنبه
- 26
- شهریور
- 1398
- ساعت
- 10:54
- نوشته شده توسط
- TzwSVsOw
- شاعر:
-
محمدرضا صادقی
ارسال دیدگاه