ایلر منه چوخ محنت غربت اثر عمه
یوخدور سوروشان حالیمیزی بیر نفر عمه
.
.
شام اهلی ائدر هر بیری بیر نوع شماتت
گوزلولله پیمبرله عجب حقّ قرابت
اولادینین حقّینده ائدللر نجه حرمت
گور شامده بو امت بیدادگر عمه
.
.
قویمور منی غصه گوز آچام درد و بلادن
هر لحظه اذیت گورورم اهل جفادن
ال چکموری بولمم نیه من بختی قرادن
آرتار غم دردیم گونی گوندن بتر عمه
.
.
تا کی اولاجاق گوشه ی ویرانه مکانیم
ای عمه یاخوندور قوری یرده چیخا جانیم
ناله ائدرم عرشه چیخار آه و فغانیم
بلبل کیمی بو شامیده شام و سحر عمه
.
.
تپراقلارین اوسته گجه گوندوز قوری یرده
یاتماقدان اوساندیم ندی بس چاره بو درده
رنگیم سارالوب گل کیمی بو عارض زرده
چون قطره ی شبنم دوزولوب اشگ تر عمه
.
.
هر چند دیورسن سفر ایلوب بابام اما
بی اصل اولاجاق یوخ بو سوزه باوریم اصلا
هر کیمسه زیارت سفرینه گئدر آیا
اولادینی زنجیره چکلّر مگر عمه
.
.
بالمرّه یقین حاصلیم اولدی بو خبردن
بولدوم که بابام گلمیه جاق بیرده سفردن
اولادینی سالمازدی بو عالمده نظردن
ویرانیه البته ائدردی گذر عمه
.
.
مندن بتر عمه سنون آشفته دی حالون
گر ساقدی بابام بس هانی اوّلکی جلالون
ویرانه ده ساخلالّا مگر اهل و عیالون
هر کیمسه ائده بیت خدایه سفر عمه
.
.
یاتدی یوخودا اوز آتاسین گوردی سکینه
دوردی دیدی ای عمه هانی شاه مدینه
گلمیشدی نه تیز گیتدی علاج ایت بو حزینه
ورنه ایدرم عالمی زیر و زبر عمه
.
.
آلدی منی آغوشه قولون بوینوما سالدی
بیر بیر سیزون احوالیزی مندن خبر آلدی
تا بزم یزیدی ایشیدوب رنگی سارالدی
اوضاع او مجلسدن اولوب با خبر عمه
.
.
بیماری سوروشدی دیدیم آزرده دی تبدار
کیمدور دیدی ویرانه ده بیماره پرستار
عرض ایلدیم عمه م اونا همدم منه غمخوار
اوز جانین ایدوب تیر بلایه سپر عمه
.
.
فرمایش ایدوب بس نیه رنگین بیله سولدی
فی الفور دیدیم درد فراقون سبب اولدی
بوینومدا کی زنجیره باخوب گوزلری دولدی
چوخ آغلادی ایتدیقجا یوزیمه نظر عمه
.
.
جایز دگی هیچ دین ده قولی باغلی اسیره
زنجیر ووروب ظلم ایده لر طفل صغیره
بو دسته حضّاریله شرمنده (حقیره)
محشرده شفاعت ایدرم مختصر عمه
- چهارشنبه
- 10
- مهر
- 1398
- ساعت
- 13:3
- نوشته شده توسط
- ابوالفضل عابدی پور
ارسال دیدگاه