او یتیمی که گلر ناله و فریاده منم
اوچ یاشیندا سارالان گل کیمی شهزاده منم
.
اورگی داغلی قولی باغلی گلن شامه اسیر
آهو تک صید اولونان ظلمیله صیاده منم
.
ناقه دن یولدا دوشوب آیری دوشن قافله دن
قالان آواره گجه قورخولی صحراده منم
.
سالموشام باشه قرا معجر زیور یرینه
روز و شب طعن و شمادتده گلن داده منم
.
من او شمعم یغارام باشیمه پروانه لری
او رقیه که غمی اود وورار اکباده منم
.
من نه مدتدی باخوب یولارا اکبر دیرم
قارداش هجرینده گلن ناله و فریاده منم
.
نازلی دلبند حسینم علی اکبر باجیسی
عالمین مفخریم ظاهرا افتاده منم
.
گوندروب شاه زمن شامه نماینده منی
ایندی افتاده لره والی بو اثناده منم
.
منه منصب ویریلوب باب الحوایج لقبی
چاره سیزلر چاغیراندا یتن امداده منم
.
هانسی گلدور یتیشه عطر و نظافتده منه
غنچه که شهرتی وار گلشن زهراده منم
.
محو اولار قصر یزیدی نه قالار نام و نشان
آدی شهرت ایلین گون کیمی دنیاده منم
.
او یاتور قصر مجللده گجه خرم و شاد
قوری یر اوسته یاتان غصه لی ماواده منم
.
او قویور بالش نازه باشینی عزتیله
باش قویان تیره ترابه شب یلداده منم
.
او ایدوب حقی فراموش اوجا قصر ایچره
قوری یر اوسته یاتوب اللهی سالان یاده منم
.
او دانوب دینی یخوب ظلمیله اسلامون ایوین
روز و شب دین چاغوران کوی غم افزاده منم
.
او دیور بس کی یتیمون کسیلر ناله سسی
نی کیمی داده گلن محنت عظماده منم
.
او دیور بس که منیم یرده بو آهیم قالاجاق
آهیله شور سالان عالم ایجاده منم
.
او هله جاهنیه مغروریدی بولمز ئولومی
کنج ویرانه جان ویرماقا آماده منم
.
او دیور ظالمه مظلوم دینمز سوزونی
اونی محشرده چکن محکمه داده منم
.
او دیور حاکمم عالمده ولی بولمور اوزی
اونی محکوم ایلین کیفر عقباده منم
.
او اوجا قصرینی آهیم ایله ویران ایده جاق
سالان عزتدن اونی عالم معناده منم
.
آغلا گوز یاشلی رقیه غمینی #اعظمی یاز
سویله هجرونده گلن ناله و فریاده منم
.
- چهارشنبه
- 10
- مهر
- 1398
- ساعت
- 13:5
- نوشته شده توسط
- ابوالفضل عابدی پور
ارسال دیدگاه