افلاکه چخوب هَمهَمه ویرانه سراده
گوردی اسرا قانلی باشی دار بلاده
غملر تزلندی
تللر سپلندی
.
.
زینب او کسوک باشون اَوَل اورتوگین آچدی
آغلار گوزی رأسِ شهِ خوبانه ساتاشدی
ایوای دیدی قارداش بو نه صورت بو نه باشدی
بیر بیله یارون کی یوخیدی نوکِ جِداده
.
.
باخدی یارالی یارینه کام آلدی رقیه
زلفین آتانون صورتینه سالدی رقیه
باخ گوردیدی نه قاره گونه قالدی رقیه
گون گورمدی هیچ نازیله بو دارِ فناده
.
.
آلدی او کسوک باشی قوجاقه ایکی اَللی
گوردوم دیدی بابا سنی من اوز گوزی کُوللی
نازیله یاتان بسترون اولدی منه بَللی
بیلدوم نجه مهمانسان آتا قوم عِناده
.
.
خوشگلموسن عرض ایتدی او قیز میر حجازه
بلبل سیاقی نغمه ووروب باشلادی نازه
قویدی دوداقین پارچالانان تشنه بوغازه
یاندی مَلَدی گَتدی باخان قیزلاری داده
.
.
بیر آهی چکوب سینۀ سوزان آراسندان
فکر ایتدی ئوپوم بیرده دوباره هاراسندان
خوشدور ئوپه آلنندا گوروب داش یاراسندان
ئوز نیّتینه ایلدی صدقیله اراده
.
.
ئوپدوکجه رقیّه اونی زینب سُولیوب نوش
ویر منده ئوپوم شعلۀ قلبیم اولا خاموش
صبر ایله دیدی قوی منی ایتسون هله مدهوش
اوندان صورا نوبت سنون ای فاطمه زاده
.
.
تا وار نفسیم من بو باشی ویرمرم الدن
آسوده قویون اوخشیوم ئوز یاریمی دیلدن
آخر بو قوناقلیق منه خاطردی ازلدن
من سیز بورا گلمزدی آتام تیره دُجاده
.
.
قویدی سارالان صورتینی قانلی عذاره
ئوپدی دوداقین گوزلرینه قیلدی نظاره
روحانی طبیبیم دیدی ایله منه چاره
آخر بو حیاته هوسیم یوخدی زیاده
.
.
ائتدون آقالیق یاخچی زمان گلدون هرایه
سالدون بو کسوک باشویله باشیمه سایه
قوی جور فلکدن ایلیوم منده گلایه
یاندیم اَریدیم گور نجه چنگال بلاده
.
.
سالدی غم اودی قلبیمی چوللرده دؤزؤمدن
سیلابه مثل خون دلیم آخدی گؤزؤمدن
زهرا کیمی ظلم اهلی ووروب سیلی یوزومدن
الدن دوتانیم اولمادی قالدیم من اراده
.
.
سن جلوه گهِ حقّیده مقصودیوه یتدون
ویلان حَرمِ طاهره نون تَرکینی ایتدون
قویدون منی اللرده پریشان هارا گیتدون
چولده چوله دوشدوم باباجان پای پیاده
.
.
ای نور خدا حجّت حق ماه شمایل
چوخداندی سنون اولمشیدوم وصلیوه مایل
اولدوم اوره گیم ایستدیگی حاجته نایل
هیچ خلوت عشّاق اولا بیلمز بو صفاده
.
.
ایکاش او قابلار کیمی اجلالیم اولیدی
بو لحظه ده پیکرده باشون سالم اولیدی
آغوشوه باش قویماقا اقبالیم اولیدی
سینونده ویریدوم بابا ـ جان نقدینی باده
.
.
از بس او یتیمه ملدی شوق و هوسدن
پروازه گلوب روحی اوچوب تیره قفسدن
رأس شه دین سینه جان دوشدی نفسدن
ایستکلی لرین غرق ایلدی بحر عزاده
- پنج شنبه
- 18
- مهر
- 1398
- ساعت
- 12:5
- نوشته شده توسط
- ابوالفضل عابدی پور
- شاعر:
-
سید تقی سیفی اردبیلی
ارسال دیدگاه