ای آنام زهرا نشانی مه لقا زینب اویان
مجتبانون جسم و جانی باوفا زینب اویان
.
گئتدی الدن قارداشون ای یدّی قارداش باجیسی
دردیوه بوندان صورا اولماز دوا زینب اویان
.
اویانمادی یوخودان زینب جگر خسته
سوروندی باجیسی کلثوم باوفا اوسته
.
او گلستان ریاض امامته لاله
دیردی بلبل شوریده تک ایدوب ناله
.
یاتما چوخ نازیله ای کلثوم غم پرور اویان
باشوه توکدی بو دوران ظلمیلن کوللر اویان
.
زهر غمدن یاندی جانیم یاتما راحت ای باجی
دور علاج ائت من غریبه قالمیشام مضطر اویان
.
علاج گورندی کلثومدن او دل پاره
خطاب قیلدی گیدوب قاسم وفاداره
.
دور آتان گئتدی الیندن ای ایوی برباد اویان
جسم جانیم همزبانیم قاسم ناشاد اویان
.
باخگیلن احوالیمه ای حسرت و ناشاد اوغول
دور یتیم اولدون منه یوخدور داخی امداد اویان
.
یتشمیوب او جنابه چو قاسمیندن اثر
دوباره زینبه قیلدی خطاب ای خواهر
.
ای ناوک بلایه نشان زینبیم اویان
قارداش غمینده قدّی کمان زینبیم اویان
.
دوغراندی زهریلن جگریم یاندی ای باجی
دور بیرجه چاره ایله امان زینبیم اویان
.
یتشمینده جواب اول امام مظلومه
پناه گتوردی گینه بخت قاره کلثومه
.
ایاقه دور گوزون آچ بیرجه باوفا کلثوم
اولان منه آنا تک یار مهربان کلثوم
.
آلیشدی زهر جفادن جگرلریم یاندی
عزیز آنام بدلی باغریم اولدی قان کلثوم
.
ز بس یانور جگریم نطقدن دوشوب نفسیم
من ستمزده ده قالمیوبدی جان کلثوم
.
اویاندی زینب و کلثوم گوردی قارداشین
الی اورکده توکر حسرتیله گوز یاشین
.
قولون آچوب ایکی باجی فغان و ناله کنان
قوجاقلیوب دیدیلر بیز اولاق سنه قربان
.
فدا اولاق سنه بیز ای سلاله الاخیار
بو نصف شبده الیندن گئدوبدی صبر و قرار
.
مگر نولوبدی سنه ای عزیز جان قارداش
نجه بلادی دوچار اولموسان امان قارداش
.
بویوردی آغلامیون ای عزیز باجیلریم
بو کوزه نون سویون ایچدوم که دوغرانور جگریم
.
دیون دورا یوخودان قاسمیله عبدالله
حسینیمی چاقورون یوخدی اوندان اوزگه پناه
.
گلوبدی زینب نالان به دیده خونبار
یتیم قاسمی چون قیلدی خوابیدن بیدار
.
ایدنده حال امام ملک رقابه نگاه
ووراردی باشینه قاسم یاناردی عبدالله
.
باخوب جوانلارینا مجتبا یانوب جگری
باساردی باغرینا جان تک او شاهزاده لری
.
دیردی ایلمیون ناله ای یتیم لریم
دوشوبدی دار بقایه داخی منیم سفریم
.
دایانمیون گئدون اول نور عینیمی چاقورون
اجل یتوب ئولورم بیر حسینیمی چاقورون
.
آچوب باشین ایکی شهزاده با دل پر غم
گئدنده گوردی یاتوب نازیلن امام امم
.
دوروب ایاقینون آلتیندا گوزلری گریان
زبانحالیله سولردی آه و ناله کنان
.
.
- سه شنبه
- 23
- مهر
- 1398
- ساعت
- 15:6
- نوشته شده توسط
- ابوالفضل عابدی پور
ارسال دیدگاه