آیریلور قارداش مزاروندن بلالی زینبون
ایلوری عزم مدینه کربلالی زینبون
.
.
ممکونوم اولسا بو قبروندن کناره گئتمرم
تا حیاتیم وار جوار رحمتون ترک ائتمرم
بولموشم گئتسم داخی بیرده وصاله یتمرم
ماجراسیندن اولوب بیر شمّه حالی زینبون
.
.
دور ایاقه سال یولا من گئتملی مهمانوام
زینب بخت قرایم دیده سی گریانوام
آیریلیق هنگامدور قارداش حسین قربانوام
آیریلور نسگلّی قبروندن وفالی زینبون
.
.
من گلنده سن منه قارداش حسین همراه دون
مایۀ عزّ و وقار و طمطراق و جاه دون
من سنون ساینده بانو ، سن جهانه شاه دون
گئتدی سنله عزّت و جاه و جلالی زینبون
.
.
واریدی قارداش گلن وقته مجلّل محملیم
نه ساچیم بیله آغارموش نه بوکولموشدی بئلیم
ایندی نه وار قارداشیم نه بیر قبیلم نه ائلیم
یثربه گئتسون نئجه یاسلی عزالی زینبون
.
.
سرو تک قدّیم هانی بس مشک سا باشیم هانی
اکبریم نولموش جوانان بنی هاشم هانی
جعفر و قاسم هانی بس آلتی قارداشیم هانی
اولدی دنیاده عجب باشی قرالی زینبون
.
.
قلبیمی بی جا خدنگ حسرتیله دلمرم
تا وارام من بیر دقیقه ناله دن دینجلمرم
بولموشم بیرده مزارون اوسته قارداش گلمرم
حسرتیله جان وئرر قلبی یارالی زینبون
.
.
من شرار محنتیله دائماً دل داغلارام
خون دل اشکیم کیمی قارداش عذاره باغلارام
بو یتیمه قزلارون باشه یغوب قان آغلارام
بیرده شاد اولماز حسین غم آشنالی زینبون
.
.
زینبه بسدور ئولونجه مایۀ درد و محن
بیر آدون بیرده بو قانلو پاره پاره پیرهن
ایلرم سنسیز برادر یثربی بیت الحزن
ناله دن دویماز بیر آن نی تک نوالی زینبون
.
.
امر دنیادن دوشن موقعده «عاصی» مشکله
صدقیله ایله توسّل زینب خونین دِلَه
اسمی بیر حرز مجرّبدور گتور هر آن دیله
قورتارا غمدن سنی تا ذوالجلالی زینبون
.
- چهارشنبه
- 1
- آبان
- 1398
- ساعت
- 14:13
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه