گئت ای صبا خبر وئر
اوغلوم رضایه گلسون
گورسون منی جوانیم
نی تک نوایه گلسون
.
.
جان اوستیم الهی
عرشه چخوب فغانیم
زهر جفا وئروبله
آرتوب غم نهانیم
خوشدور جنازم اوسته
حاضر اولا جوانیم
یوخ بیر کسیم یانمدا
شور و نوایه گلسون
.
.
ظلمتدی کنج زندان
نه حالیمی بیلن وار
نه عترتیم یانیمدا
بیر محبسه گلن وار
زنجیر گردنیمده
قلبیمده چوخ محن وار
بیر کیمسه یوخدی ئولسم
دورسون عزایه گلسون
.
.
آهیم سالوب شراره
هر لحظه نه رواقه
زنجیر و کونده قویمور
آخر دورام ایاقه
گلسه رضا قویاردوخ
بیرده دوداق دوداقه
جان وئرمه میش صبا دئ
اول مه لقایه گلسون
.
.
جان اوستیم نولیدی
بیر اقربا گلیدی
بو صون نفس سراغه
بیر آشنا گلیدی
معصومه که گلنمز
اوغلوم رضا گلیدی
یوخ اؤزگه بیر پناهیم
باری هرایه گلسون
.
.
گلَّم صباح و شامی
زندانیده فغانه
من بیر قوجا امامی
دشمن گتوردی جانه
زهر جفا وئروبلر
آخر بو باغریقانه
کیمدور وئرن تسلّی
بو بینوایه گلسون
.
.
هارون بی مروّت
ظلمنده ائتدی طغیان
بغداده گتدی جبراً
اولدوم غریب و نالان
مسموم ائدوب ستمله
حالیم اولوب پریشان
انصافی یوخدی رحمی
بو بینوایه گلسون
.
.
صیّاد جانشکاره
آهو کیمی شکارم
بیر کیمسه یوخ یانمدا
بی یار و غمگسارم
آخر بالام رضایه
جان اوسته انتظارم
چوخ مایلم که اوغلوم
بو غم سرایه گلسون
.
.
منزل اولوب بو زندان
من زار وبی نوایه
نی تک سیزیلدارام من
یانّام بو ابتلایه
دیوارلر وئرولّر
منله صدا صدایه
اهلیم هانی یانیمدا
تا آه و وایه گلسون
.
.
جدّیم حسینی بوردا
هر آن خیاله سالّام
جان وئرماقین بو یرده
سرمشقین اوندا آلّام
یوخ طاقتیم قیامه
من سجده گهده قالّام
جدّیم نولور باخوب بیر
بو ماجرایه گلسون
.
.
جدّیمده جان وئرنده
قالمیشدی سجده گهده
گلمیشدی شوره یکسر
اطفالی خیمه گهده
سویلردی شمر شومه
بو نوعی قتلگهده
ظالم دایان آنام بیر
دشت بلایه گلسون
.
.
باب الحوائج آدی
ای باب لطف و احسان
بیکس «علومی» اولموش
دنیا غمینده گریان
ایسته خدادن آخر
تاپسون ملالی پایان
صدقیله بارگاهِ
آل عبایه گلسون