منی تا رهگذر گوردی بو دل ویرانیه گولدی
گوروب ویران نشینم من بئله کاشانیه گولدی

نگارا شمع عشقونده وجودیم اوت دوتوب یاندی
یانیردیم مدعی باخدی یانان پروانیه گولدی

ددیم بازار حسنونده سنه منده خریدارم
جماعت ریشخند ائتدی من دیوانیه گولدی

سراغون کو به کو آلدیم سوروندوم میکده ساری
تحقرله باخوب زاهد در میخانیه گولدی

ال اوزدوم کنج مسجدن گلوب میخانه ده قالدیم
گوروب احوالیمی ساقی دولی پیمانیه گولدی

گوزون ساغرباخیشلار می گوزوندن تاکی جام آلدیم
خرابات اهلی مستانه دل مستانیه گولدی

کیمه من سویلدیم عشقون نهایت آب و تابیله
قولاخ تا آسدی آخیرده هامی افسانیه گولدی

سنی درک ائتماقا دلبر تماما عقل حیراندی
تعجب یوخدی عاقلر بئله هنگامیه گولدی

جهاندا یوخ بها (طائر) بونی مجنون دان اورگشدیم
نئجه بو طمطراقیله جهان فانیه گولدی