به سبک (سن آت اوسته پای پیاده من)نجه عمّه دوزسون اسیر اوشاق بو قدر بلایه خرابه ده
قالوب ایسّی گونده تاپانمیه گون ایوینده سایه خرابه ده
دؤزه هر بلایه خرابه ده
من بینوانی خرابه ده غم و محنت و محن اینجیدور
اورگیمده سلب قرار ایدوب بو قولومدا کی رسن اینجیدور
یتیشن شماتت ایدور منه گلن اینجیدور گیدن اینجیدور
هله یتمیوبدی مصیبتیم منیم انتهایه خرابه ده
من او بلبلم بی بی جان ایدوب منی چرخ دون چمن آیریسی
یتیشوب خزان گل و گلشنه ایلیوبدی یاسمن آیریسی
اوزولوب ائلیمدن الیم منیم اوزوم اولموشام وطن آیریسی
یری وار که اوج ایده شیونیم یته نُه سمایه خرابه ده
شه دینه سُوگلی بیر قزام بو خرابه کنجی دی مسکنیم
من اگرچه شه قزیام اولوب قوری توپراق اوستی نشیمنیم
تاپا بولمورم بابامی گیدم اونا التجایه خرابه ده
داغیلوب جلالت و جاهیمیز آدیمیز اسیردی یوخ سوزوم
بولوسن بو نکته نی سن اوزون بو جهاندا شه قزیام اوزوم
نجه بو فشاره بو محنته من بینوا دایانیم دؤزوم
نجه من شکایته آچمیوم دلیمی خدایه خرابه ده
گورہ سن بلایه دچار اولان تاپیلار منیم کیمی بیر نفر
گوره سن منیم کیمی هانسی قز بو جهاندا خون جگر ییر
هانی بیر اسیر که من کیمی گوزی یاشلی یوللارا گوز تیکر
چکوب آه سرد دروندن گلر آه و وایه خرابه ده
هانی بیر یتیم شکسته دل که ایشی منیم کیمی سخت اولا
سُؤنه شمع عزتی طعن ایدن اونا دشمن قره بخت اولا
اولا متكاسی کلوخ اونون بو خرابه توپراقی رخت اولا
نجه بیر صغیره دوام ایدر بیله ابتلایه خرابه ده
گتوروبدی جانه منی محن دل زاردن کسیلوب توان
سالورام خیالیمه دمبدم اوز اوزومله فکر ایدورم هر آن
دیورم بو شامده وار خدا گوره سن منیم کیمی باغریقان
تاپولار شبیه بلا چکن من بینوایه خرابه ده
اورگیم زبس یانور آغلورام بابا وای دیوب ایدورم فغان
دیوسن که صبر ایله سُؤگلوم سفره گیدوب گله جاق بابان
چکوم انتظار نه وقته دین گله جاق بابام دی گوروم هاچان
اولاجاق شریک ملال و غم بو غم آشنایه خرابه ده
ندی علتی منی بیر بابام بیله یرده یادینه سالموری
بو خرابه یرده گلوب ندن منی بیر قوجاقینه آلموری
بولوری اوزی که رقیّه نین اورگینده طاقتى قالموری
بابا سسلیوب گُلی نی کیمی بالاسی نوایه خرابه ده
او بلا چولونده بابام حسین او گونی که گول تک ایدوب غروب
بی بی جان بو کاسۀ چشمیمی بو زمانه اشگیله دولدوروب
توکوب اشگ ناله ایدنده من ستمیله اهل جفا ووروب
بخصوص چوخ یتشوبدی غم من مبتلایه خرابه ده
یاخوری فراق اودی قلبیمی ولی وصل یاره چاتانمورام
بابامین خیال محبتین نه ایدیم باشیمدان آتانمورام
منی سینه اوسته او بسلیوب بو خرابه یرده یاتانمورام
بیله روزگاردن ایترم اودی چوخ گلایه خرابه ده
منیم اختیاریمی سلب ایدوب غم فرقت شه ممتحن
اولا گر منیم بابامی منه بو خرابه یرده نشان ویرن
ایلیم خموش فراق اودون و یررم بو جانیمی مژده من
ایدرم ثبوت وفامی من هامو ماسوایه خرابه ده
بولورم که تائب نوحه خوان ایشی لنگ اولوب ایتیروب اوزون
هامودان كسوبدی علاقه سین او بو دودمانه تیکوب گوزون
اولی حلّ مشگلی هرنه وار ایده ذکر بیرده ازل سوزون
نجه عمّه دؤزسون اسیر اوشاق بو قدر جفایه خرابه ده
- چهارشنبه
- 14
- آبان
- 1399
- ساعت
- 19:13
- نوشته شده توسط
- یوسف اکبری
- شاعر:
-
صادق تائب
ارسال دیدگاه