خلق آختارشور، فیض بُکا مَرثیه لردن
بیر عدّه گزور، نان و نوا مَرثیه لردن
بیر گون واریدی مُخلص و بی رِیب جماعت
درک ایلریدی، رنگ خدا مرثیه لردن
حَتّی او که سُست عُنصریدی، سُست عقیده
ایلردی عزا وقتی حیا مرثیه لردن
علّت نَدی بیلمم ایشی کیم بو یِرَه چکدی
گورسَنمور اجابَتلی دعا مرثیه لردن
از بس که دوشاب رنگینی خالص بالا قاتدوق
های هوی چوخالوب، کوسدی عزا مرثیه لردن
یوخلاتدی مَنیّت بیزی اِئلدَن دالا قالدوق
سندی عجبا قدر و بها مرثیه لردن
تأثیر نَفَس ئولدی، قولاقلاردا دوتولدی
بی قاعده و خِبط و خطا مرثیه لردن
چوخلار ئوزی ئوز نَفسینه مَشّاطه لیگ ایلر
بیر عدّه دَه ایسلاتدی حَنا مرثیه لردن
شاعر اَل ئوزَنمور هَلَه دفتر قلمیندن
بعضی قازانور، سکّه طلا مرثیه لردن
حق سوز بیلورم تَلخ دی دشمن قازاناندی
من اِیلَمَرم حقّی جُدا مرثیه لردن
عشقون بِئلینه باغلامشوق بار تجارت
غربتده قالوب کربُ بلا مرثیه لردن
انسانلیقی سالدوق قفسه، شهرته خاطر
مَردُمدن ایدیم من گِلَه ، یا مرثیه لردن
شکر ایلورم آللهه گینه منده نَفس وار
گلمور گورورم بوی صفا مرثیه لردن
مین تخت سلیمانه دگر دولت عشقیم
دلداریم اگر اولسا رضا مرثیه لردن
"سیفی" سنه زینبدی ویرن طبع روانی
قویما آزالا بوی وفا مرثیه لردن
اربابون آدین دفترووَه یازما وضوسیز
تا ساطع اولا نور ولا مرثیه لردن
اَحسَن لره آلّانما، تلاش اِئت قوجا شاعر
تقدیر ایلَسون خَیرَه نساء مرثیه لردن
- جمعه
- 30
- آبان
- 1399
- ساعت
- 20:31
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه