قولاقدا ساخلامیشام بو سوزی جوانلیقدان
گوزلدی قرمز ئولوم قاره زندگانلیقدان
ملاک، عقلیدی انسانه استقامتدی
کیمون چراغی یانوب صبحه تک قرانلیقدان
جهاندا خواجه نصیر اول، نه ملانصرالدین
گوزلدی عالمه دانالیقون، نادانلیقدان
همیشه صرف ائله تحصیل علمه اوقاتون
دولان او قدری چیخا باشماقون دابانلیقدان
حدیث اطلبوالعلمی ائشیت ولو بالسین
داریخما علم سنی قورتارار رومانلیقدان
حقیله باطلی، زشتیله خوبی، علم آییرار
صفا قازان، چمنه فرق قوی تیکانلیقدان
صباح اولور گئجه گوز یولدا قالدی گلمدی یار
قلوب منتظران قاندی ناگرانلیقدان
هایانداسان آقا دوتموش جهانی فسق و فجور
فساد و فتنه، زمانی سالوب زمانلیقدان
کریما گوجیوی قوله وئرمه، وئر عمله
نتیجه آلمادی بیر کیمسه قصه خوانلیقدان
- شنبه
- 1
- آذر
- 1399
- ساعت
- 22:14
- نوشته شده توسط
- یوسف اکبری
ارسال دیدگاه