من او زهرایم آز عمریمده جگر داغلامیشام
آقامون جنگیده دوخسان یاراسین باغلامیشام
یاراسیندان توکولن قانی یووب آغلامیشام
ای گوزوم آغلا بولود مثلی دولان زهرایم
کوینک آلتدا یاراسی گیزلین اولان زهرایم



دشمنیم سعی ایلدی آلسون الیمدن فدکی
ایسته سم آدیمه معبود یازار نُه فلکی
فدکیم گیتدی،الیمده وار علینون اَتَگی
جامه ی عشق نگاره بورونن زهرایم
سینه یاره، دالیسیجا سورونن زهرایم


آتام اولسیدی بلا سیندیرا بیلمزدی منی
سیل تک غم توکولیدی یورا بیلمزدی منی
قورخولی کوچه‌ده دشمن ورا بیلمزدی منی
رهگذرده سَنَدی پاره لَنن زهرایم
آی سوز اهلی قولاقی یاره لَنن زهرایم


دؤزرم دلدن آتینان آنامون داغلارینا
گئچدی اول گون که چیخاردیم اُحدین داغلارینا
آپارا بیلمم حسینی فدکین باغلارینا
بابامون ملکینه حسرتله باخان زهرایم
آخ دییَنده یارادان قانی آخان زهرایم


باغیمی ویرسه له بَطحانی گلستان ایدرم
دردیروب میوه لرین سائله احسان ایدرم
بذل و انفاقمیله گبری مسلمان ایدرم
کوینگین‌طوی گئجه‌سی بخشش ایدن زهرایم
حجلیه کهنه لباسیله گیدن زهرایم


من او زهرایم ایدر غبطه ملک منصبیمه
قونمیوب دهریده ذلّت توزی چادر شبیمه
شیرزنلیق یولون اورگتمیشم ئوز زینبیمه
ایندیدن کرب و بلا فکرین ایدن زهرایم
دادینه قانلی بیاباندا گیدن زهرایم