كربلا دشت غم افزادى بيوك بير وادى
شوره يردور شن و ماسيله دولوب ابعادى
چون كناريندن آخور نعره كشان شط فرات
اوردا شدتله اسر دائمى صرصر بادى
گورممشدى او زمانلار مدنى طبع بشر
عرض و طولنده نه بير شهر و نه بير آبادى
گاهى ايلوردى او صحراده عشاير اوتوراق
صورا آنلاردى نجه وادى جان فرسادى
ولى واضح يوليدى حاشيه ى نهر فرات
كوچ ائدنلر گوره هاردان هارا رهپيمادى
لوح تقديرده گويا اولونوب طراحى
مكريلن توليا شيطان بير ائوى بر بادى
دوندره كوفه يولندان اورا بير قافله نى
قورخوشا غائله دن فاطمه نون اولادى
اولارى دوره ليه ابن زيادون قوشونى
چاتا بش گونده اوتوز مين نفره تعدادى
چكه لر دور حسينه ايله مستحكم حصار
چاتميا بير يره مظلوملرون فريادى
ايكى نهرون آراسيندا اولا لب تشنه شهيد
اگننه قاره گيه اُم و أب و اجدادى
ديَن اولمادى يازوبسوز اونا دعوتنامه
نامه لرده ساييلان اون ايكى مين امضادى
قوناغ آديله ييغوب اهل و عيالين باشنا
گوييا هچ تانمور كوفى بد بنيادى
سنديروب بيعتى حيثيتوزى محو ائلدوز
تا حسينون آدى وار كوفه ليلر رسوادى
اولارون عده سى آزدور ولى ايمانى قوى
وئرمز اون مين نفره تك به تك افرادى
وار ولى توبيه مهلت گنه آخر گجه نى
او گجيكه سحرى محشر عاشورادى
او گجه لشگر غافل هامى گئتدى يوخيا
صبح اولوب گورديله ميداندا عجب غوغادى
بير شجاعتلى جواندور الى اللردن اوجا
علمى گوگده اَسور حمله سى برق آسادى
گورسنن بيرجه اوزون الدى بير عريان شمشير
برق و باد اوسته مينوب مركبى ناپيدادى
صفلرى صفحه ى كاغذ كيمى پيچيده ائدوب
گوييا يل داغيدوب پاره لنن اسنادى
بير آقا بير خانم اما دايانوب تل اوسته
گوره لر عرصه ى ميداندا نجه بلوادى
او خانم سسلور اوزون قوللارا زينب قريان
ئوزووى گوزله ابالفضل حسين تنهادى
گورديلر سد الينمور يولى دورت مين اوخ آتان
تيغى مرگ آور اوزون نعره سى خون پالادى
دئديلر خالى ائدون فورى فراتون يولونى
بو گرك سو آپارا خيمه لره سقادى
ئولن ئولدى داغلوب صفلر آچلدى سو يولى
نيتى خيردى چونكه عملى زيبادى
پرچمى ووردى يره يعنى فرات اولدى بيزيم
سويى آلديم اليه خيمه ده قيزلار شادى
بير اُووج گوتدى سو ايچسين دئدى اى نفسيم اوتان
حج عشقونده بو تقصيردى وار ايرادى
سويى آتدى يره فورا ائلدى مشكى پر آب
ايستدى شاه نجفدن ئوزونه امدادى
تشنه لب چيخدى سودان تشنه لرون خاطرينه
مرحبا گور نه گوزل درس وئروب استادى
خيمه لر سمتنه يول باشلادى نخلستاندان
شير هيجانى كمين ائتدى قضا صيادى
مرتضى قيتره بيلمزدى قضا پنجه سينى
اوغلنون هاردان اولار بير بله استعدادى
سالدى بير بير او اوزون اللرى دشمن تبرى
مشگى اوخلاندى هامى غمدن او غم عظمادى
اوخ آتان وئرمدى مهلت باخا سقا سويونا
چون قضا حمله ايده عكس العمل بيجادى
گوزلرين قان بوريوب مركبى ويلان دولانور
خيميه گئتسه بو احواليله واويلادى
يالوارور مركبينه خيمه سرادن اوزاق اول
تشنه لر گورسه منى روحيمه چوخ ايذادى
يوخدى مشگيمده سويوم خيميه سارى گئتمه
اولا شرمنده گوروم بو اوخ آتان شدادى
چست و چالاك دولان اللره سالما باشمى
بو باشون صاحبى نور بصر طاهادى
صبرون اولسا باشيمون صاحبى الان يتيشر
نفسى مشگ فشاندور دمى روح افزاى
گوزلورم شه گله تعظيم ايدوب اوندان يخيلام
قويمارام دورمه شه گلمسه هيچ جلادى
منتظردور او چتين وقت آلا قارداش سسينى
گوردى اوندان قاباق امداده گلن زهرادى
دئدى شرمنده دى دى عباسوه اوز وورما ننه
نوكرين گوزلرى چون منتظر مولادى
قوملار اوستى منه چوخ نوشيدى سينوندن آنا
چونكه سينونده يارون وار منه درد افزادی
- جمعه
- 5
- دی
- 1399
- ساعت
- 23:25
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه