ایهاالناس گلون گردش دورانه باخون
قدر‌ت مطلقه خالق سبحانه باخون
اویمیون فانی اولان کبکبیه ، دَبدبیه
چشم عبر‌تله گلون عالم امکانه باخون
زرق وبرقیکه گورورسوزبوفنادهریده سیز
یئل اسن وقته گئدین شمع شبستانه باخون
بیرسنیق کورپیه بنز‌رسویون اوستنده جهان
اوردا منزل ائلمز عاقل و فرزانه باخون
باخمیون هرزه آغیزلاردا اولان لغلغیه
انبیاء صحبتینه ، پند حکیمانه باخون
قویمایین خوار اولا قرآنوزی انجیل کیمین
توزباسوب گرچه سیلون،بیرده بوقرآنه باخون
مسلمینون سایی میلیاردی گئچیب دنیاده
ولی بو کثر‌تلن نسبت نقصانه باخون
هامی ادیان آراسی بو دینی الله بَیَنوب
بیر گلین سیزده پسندیدۀ یزدانه باخون
دئمیون ملت اسلام عقب افتاده دیلر
ضعف اسلام دَگول،ضعف مسلمانه باخون
اجنبی تفرقه‌سی یئتمیش ایکی فرقه ائدیب
اولدیلار بیر بیرینه گورنئجه بیگانه باخون
قلب اسلامیدی مکه اوتوروب آمریکا
قل اعوذ اوخویون قلبده شیطانه باخون
شیعه‌لیک جوهری هر یئرده کی وار غیر‌ت وار
دورد ابر قدرتی رد ائیله‌دی لبنانه باخون
انبیاء مکتبی انسانه سعادت یارادار
خبث ابلیسی بیلین، حکمت لقمانه باخون
آز بوبش گونلیک اولان نعمتی دورداللی دوتون
سعی ائدون عالم اولون ،عالم عرفانه باخون
هر شب جمعه گئدین ساحت قبریستانه
توپراق آلتیندا یاتان سائل و سلطانه باخون
عرض و طولینده بیر آز فکر ائیلیین قبرلرین
جُرم حبس ابده ، تنگی زندانه باخون
ناز بالیشده یاتان گونلرینی فکر ائلیین
داشا پَر قو یئرینه باش قویان انسانه باخون
بو همان شخصیدی قویمازدی قونا توز باشینا
توپراق آلتیندا یاتیب گور نه ذلیلانه باخون
بو همان شخصیدی توپراقه ده قویمازدی قدم
باش قویوب ایندی او توپراقه فقیرانه باخون
نه سالیر یادینه اولادی نه ده اقوامی
هی سز یلدیر بالالاریم ، من نالانه باخون
من گوز اوستونده سیزی بسله میشم دنیاده
قاباقیزدا آچیلان سفرۀ الوانه باخون
سیزون استوزده یالان قالمادی من خلقه دیدیم
سیزلره خاطر الیمد‌ن گئد‌ن ایمانه باخون
یالان آند ایچمیشم ازبس که رسول اللهه
اودا کی دشمن اولوبدور من نادانه باخون
آل وئریمده سپر ائتمیشدیم ابوالفضل آدینی
اودا لطفین کسیب از بس، بو پریشانه باخون
سیزه خاطر نه ترازونی دوزلتدیم نه داشی
کم ساتیب آرتیق آلان سفله مسلمانه باخون
- جمعه
- 5
- دی
- 1399
- ساعت
- 23:49
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه