گنه قلبیم دوتولوب واله وحیران گزورم
بعضی انسانون الیندن اورگی قان گزورم
اوقدر واردی بیزیم جامعه ده شرّ وفساد
بوسببدندی کی همواره هراسان گزورم
قورخورام بوالبشر ایجاد ائلین فاجعه دن
اودی کی جامعه میزدن بئله پنهان گزورم
بیر زماندور دئمگ اولمور بیرینه حق سوزونی
دئمگه حق سوزون البته مسلمان گزورم
یوخدی بیرکیمسه اونا دردیمی اظهار ائلیم
قالمیشام یاللعجب حالی پریشان گزورم
حالیمه باخسون اگر واقف اولارسان سوزومه
کی بیلرسن نیه من سینه سی سوزان گزورم
باراللها سنی وئرم قسم اوز عزّتووه
ناامیدایلمه بوبنده نی نالان گزورم
لطف ائله گلسون حسینون خلف و قان آلانی
اودی هرصبح ومسا دیده سی گریان گزورم
گلسه سلطان شرافت قدمیندن اوپرم
دیئرم سندن اوتور دست بدامان گزورم
افتخاریمدی منیم بوسه ویرام مقدمینه
بئله امکان اولا هرلحظه شتابان گزورم
دوگمیشم صدقیله عالمده کرملی قاپوسین
درگهیندن آقامون بخشش واحسان گزورم
بوفنا دهریده گلسه نه غمون تیموری
تاپماقا منده سنون تک سروسامان گزورم
- یکشنبه
- 7
- دی
- 1399
- ساعت
- 14:57
- نوشته شده توسط
- یوسف اکبری
- شاعر:
-
علی تیموری
ارسال دیدگاه