فکر ایله دیم مدیحه سنه هانسی ال یازا
گوردوم گرکدی مُنشی لوح ازل یازا
از بس مليحسن او گوزل حُسنیدن گرَک
سعدی حکایت ایلیه حافظ غزل یازا
توک قاره تللرین یوزه چون قورخورام رقيب
گورسه جمالیوی گونه ضرب المثل یازا
گر اوخشادام سنی آیا اولدوز گولر منه
انصافیدور مگر بیری اصله بدل یازا
پروین گزر دالونجا سوسوز مشتری کیمی
زهره ایدر اشاره که وصفين زحل یازا
شیرین ترانه لر نمکین لبلرونده وار
عارف گرک او لبلره قند عسل یازا
سن برگزیده سن صمدی سن صنم ندی
کافردی قل هواللّها هر کیم هبل یازا
عمروم قوتولدی گلمدی دعوت نگاریدن
یاریم نولور براتیمی قبل از اجل يازا
ای نازنین هایاندی محل اقامتون
تا دل اوزون حکایتنی ماحصل یازا
ارسال ایدنده نامه قلم ناگزیریدور
گیرنده نین نشانه سینی بی محل یازا
ایکاش او لحظه نین که اولار قامتون علم
توصیفین اهل علم یوخ، اهل عمل یازا
دوزسه گوزللرین آدینی رشتیه قلم
شیرین آدون گرک هامسیندان اول یازا
قربان اولوم او گوزلره بیر باخ «کلامیه»
تا آیریلیق سوزون گونی گوندن گوزل یازا
- پنج شنبه
- 11
- دی
- 1399
- ساعت
- 14:38
- نوشته شده توسط
- یو.سف اکبری
- شاعر:
-
ولی الله کلامی زنجانی
ارسال دیدگاه