اَشرفدی خَلایقده بو انسان نَیَه خاطر
خلق ائتدی بیزی حضرت سبحان نَیَه خاطر
بو قَدری تَمایُز وئریلوب خلقتین ایچره
مابین بنی آدم و حیوان نَیَه خاطر
خَلّاق هنروَردی بو مخلوقین حکیمی
انسانی عزیز ائتدی کماکان نَیَه خاطر
طاووسه گوزلیک یتیشوب ضِیغَمه صُولت
صاحبدی آلا گوزلره جیران نَیَه خاطر
شهبازه قَناد وِئردی ائده گویلری تَسخیر
دریاده نهنگ ایلوری طوفان نَیَه خاطر
بیر گون دئدی بو مطلبی مَعبوده سلیمان
ذِهنیمده سوزوم وار دِیوم اَلان نَیَه خاطر
حیرانم الهی بِله اَسراره ، دِیوم قوی
سرگشتِه یَم ای صاحب فرمان نَیَه خاطر
واضِحدی که هر بیر ایشوون حکمتی واردی
واقفسن ئوزون خلق اولور هر جان نَیَه خاطر
ذِهنیمده وَلیکن منه مُبهمدی بو مطلب
خِلقَتده بو مور اولدی نمایان نَیَه خاطر
فرمایش ائدوب قادر مَنّان بو جوابی
بیلَّم نَدور علّت ، نَدی برهان ، نَیَه خاطر
پوشیده دی مَخلوقیمه چوخ سِرُّالعَجایب
سیرینده گَزور کونیله امکان نَیَه خاطر
امّا سنه بیر چشمه آچوم سِرّ مَگودن
چوخ سوزلر اولار عالَمه پنهان، نَیَه خاطر
آتمیش یول همان موریده مندن سوروشوبدی
خَلق اولدی اِلهی بو سلیمان نَیَه خاطر
ای ماخَلَقی حِکمَتیلن خَلق ائدن اَلله
آگه سن ئوزون قالمیشوق حیران نَیَه خاطر
گویا داراشوب مَملکته آل اُمیّه
تاوانی وئرور ملّت ایران نَیَه خاطر
بیر یاندادا سالمیش کورونا عالَمه دردی
نازِلدی بلا بیزلره هر آن نَیَه خاطر
سن بیل او اَبَاالفضلین اوزون قولّاری یارب
آدلاندی بیلورسن که او اَصلان نَیَه خاطر
عَفو ائت بیزی نَهر اوسته باتان ماهِ مُنیره
قویما بیزی اِغفال ائده شیطان، نَیَه خاطر
سوز گَلدی اَبَاالفضله ائدیم قوی بیر اشاره
تاپدی بِله بیر رُتبهء شایان نَیَه خاطر
دولدوردی همان نَهریدن ئوز مَشکینی سقّا
ایچموبدور ئوزی آب رواننان ،نَیَه خاطر
بیلدی بالالار گُل کیمی مَخیَمده سولولّار
آغلاردی او ششماههء عطشان نَیَه خاطر
اوخلاندی سو مَشکی ایکی قولّار قَلم اولدی
شرمنده یاتوب اول مَه تابان ، نَیَه خاطر
بیلدیم نیه تا نَهره گَلینجه شه عطشان
قَدّی بوکولوب ، باغری اولوب قان نَیَه خاطر
(نادر) گَل اوتور فکر ائله بو قال و مَقاله
چاتدی بیزه بو حال پریشان نَیَه خاطر
- شنبه
- 20
- دی
- 1399
- ساعت
- 23:7
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه