گلدی بیر گون منزله مولا علی
گوردی زهرانی، ملول اولدی،ولی
فضه نون، مولا باخوب گوزیاشینه
هی دولانور،فاطمه نون باشینه
اهل کین گورستدیلر،ئوز کینه سین
سیندیروبلار ذات حق آئینه سین
کینه و ظلمون خدایا،حدی وار..
صورت زهراده سیلی ردی وار..
گل کیمی بین در و دیواریده
وار خزان رنگی،نوک مسماریده
آچمورام،قالسون،هله کوچه سوزی
روضه سین بیر گون اوخور،مهدی ئوزی
بستر بیماریده زهرا یاتوب
یاره لی،انسیه ی حورا یاتوب
تا علینی گوردی گولدی لبلری
شاد ائدوب فتاح باب خیبری
تز،سلام ایتدی او حالدا حیدره
خلقا و خلقا چکوب پیغمبره
شیرحق،زهرا یوزوندن،دویمادی
ایسته دی دورسون ایاقه،قویمادی
حیدره تسکیندی نام فاطمه
ویردی روحیه سلام فاطمه
باشینون اوستونده اگلشدی علی
ایتدی فرمایش او دم،حقه ،ولی
فاطمه؛قربان سنه اولسون جانیم
امر ائله گویلون نمه ایستور خانیم؟
سویلویوبدی،ای ولی کردگار
گویلوم ایستور میل ایدم الان انار
تز ایاق اوسته دوروب شاه زمن
فتح باب ایتدی او دم،خیبرشکن
امر زهرانی اطاعت ایلسون
فوری فرمانین اجابت ایلسون
سالدی هر سمته، ولی حق،گذار
تا تهیه ایلییه، بلکه انار
گوردی اصحابی،دیوللر:یاعلی
شاهکار خلقت ای نور جلی
اولماسین ناراضی بیزلردن گوگول
ایندی مولا،فصل اول میوه دگول
بیر نفرده وار او میوه گوئیا
آدی شمعون،دین یهودی،برملا
قلب مولانی بو غم بی تاب ائدوب
خانه ی شمعونی دق الباب ائدوب
ماجرانی شرح ایدوب،اول نامدار
اهل خانه عرض ائدوبدی،بیزده وار
آلتی درهملن،آلوب اول میوه نی
شاد ائده دورت بلبلی،بیر گلشنی
افتخار ماخلق، دوشدی یولا
چوخ تواضعلن باخور صاق و صولا
ئوز ئوزویلن ،ذهنیده ،ایلور خیال
فاطمه خوشحال اولار،اولسا وصال
گر یتیشسم منزله،الساعه من
شاد اولار زهرا،حسینیلن،حسن
انتظار فاطمه،پایان تاپار
زینب و کلثوم و فضه،جان تاپار
ایتدی بو افکار، ذهنیندن، خطور
یولدا بیر،ویرانه دن، ایتدی عبور
هی باخور الده اناره،دینجلور
ناگهان گوردی حزین بیر سس،گلور
بیر مریضی گوئیا اوردا یاتوب
بیر کسی یوخ،عالمی گوزدن آتوب
مرتضی،فورا،عیادت ایلدی
حالینی گوردی ،حمایت ایلدی
ایتدی فرمایش ولی کردگار
صاحب شان و وقار و ذالفقار
ایستییوب الله،بو یردن یول سالیم..
عرض ایله گویلون نه ایستور؟،من آلیم
باخدی مولایه مریض خسته حال
ایتماقا صحبت ،توان ویرمور مجال
ائلیییور ویرانه کنجینده نوا...
هم سوسوز،هم آجدی،هم ایستی هوا
ضعفیدن،عاجزدی صحبت ایلییه
دردینی ایستور که بیر نوعی دییه
بیر بیریندن،گوتدی ناگه لبلرین
لحظه ای بین دولب،اولدی سرین
رهگذر!چوخ آشنا گلدی سسین
عالمه،الله سنی چوخ گورمه سین
قلب زاریمده گورورسن غصه وار
گویلوم ایستور میل ائدم الان انار
باخدی مولا صحنه یه،چوخ آغلادی
سسلدی یا فاطمه،دل داغلادی
اگلشوبدی باشینون اوسته علی
آشکار ایتمور،ئورک سرین ولی
باخدی بیر الده،انارین رنگینه
اول مریضین،غصه لی آهنگینه
اولمادی قسمت،گیده تز منزله
لنگر ارض و سما گلدی دیله
وار گوزی،بوندا،عزیزیمده منیم
ایوده واردی،بیر مریضیمده منیم
اول مریضون، بنده،خاطرخواهیدی
عیبی یوخ الله،کریم،اللهیدی
بو اناری،سن اجازه ویر منه
دانه دانه نصفینی،ویررم سنه
مرتضی،گور اول مریضه نیلدی؟
اول اناری دانه دانه ایلدی
ویردی نصفین ئوز الیلن،شه ئوزی
گوردی نصف دیگرینده وار گوزی
تز او نصف دیگرینده بذل ائدوب
دست خالی،پیش زهرایه گیدوب
شاعرین،دولدی گوزی،مولا علی
وار سوالیم ایندی سندن یا علی...
بو گریزیم قلبیمه ویردی یارا
کنج ویرانه هارا،زینب هارا؟
آج قالوبدی اهلبیت طاهره
ویردیلار طعنه،او جمع حاضره
حقی وار،گوزلر،بولود مثلی دولا
اهلبیتون باغلویوبلار قول قولا
یاعلی؛ظلمونده آخر حدی وار...
هر اسیرین،قولدا قمچی ردی وار
دهریده اعدا چاتوب آمالینه
باخ مریض کربلانین حالینه
چاتدی عرشه قیزلارین،یورقون سسی
اوچ یاشیندا نازدانن،ناله سی
مستحقه،سن کرامت ائتموسن
هر مریضه،چوخلی حرمت ائتموسن
ایندی فاش ایله ئوزون بو مطلبی
شامه وارد اولدی زینب موکبی...
بس نیه ویرانه ده جای طعام!
یکسره ایودن چیخوبدی اهل شام
پیشوازه،آتماقا،داش گتدیلر
سو یرینه،بیر کسیک باش گتدیلر
- دوشنبه
- 22
- دی
- 1399
- ساعت
- 22:54
- نوشته شده توسط
- یوسف اکبری
- شاعر:
-
بهلول حبیبی زنجانی
ارسال دیدگاه