آچ گوزلریوی بابا زینب اولا قربانون
دامانیمه گل مثلی باشدان توکولور قانون
ای سلطان عشقیم یاتما اماندی
باشوین اوسته زینب باغریقاندی
قلبیمدن آخان قانه گوزیاشلاریمی قاتما
نرگس کیمی گلشنده آچ گوزلریوی یاتما
سن بیل ننمون جانی دیندیر منی آغلاتما
قلبیم سخیلوب غمدن چوخ سختیدی هجرانون
ای سلطان عشقیم یاتما اماندی
باشوین اوسته زینب باغریقاندی
سینسون فلکین چرخی سچلارمی آغ هوردی
زهرا قیزینا دائم خوش گونلری چوخ گوردی
بیر سوز دانیش آی بابا عباس ئوزین ئولدوردی
جانیم اولا قربانی غیرتلی دی اصلانون
ای سلطان عشقیم یاتما اماندی
باشوین اوسته زینب باغریقاندی
محراب عبادتده ووردی سنی ناکس لر
قانه بویانان قلبیم زیبا آدیوی سسلر
دور گیت بابا ائولرده گوزلر سنی بی کسلر
الان سنی ایستوللر بیچاره یتیمانون
ای سلطان عشقیم یاتما اماندی
باشوین اوسته زینب باغریقاندی
یوم گوزلریوی دینجل یورقونسان اگر گیتمه
گل تک سارالوب رنگون ای نور بصر گیتمه
قویما منی ظلمتده خورشید سحر گیتمه
پیوسته اولوب قاندان مژگانویه مژگانون
ای سلطان عشقیم یاتما اماندی
باشوین اوسته زینب باغریقاندی
واضحدی کی قرآنه پیوسته سن آی بابا
دوزدور کی یتیمانه دلبسته سن آی بابا
یورقون جانوا قربان یات خسته سن آی بابا
گرچه بیلورم راضی اولماز بونا وجدانون
ای سلطان عشقیم یاتما اماندی
باشوین اوسته زینب باغریقاندی
- جمعه
- 26
- دی
- 1399
- ساعت
- 19:6
- نوشته شده توسط
- یوسف اکبری
- شاعر:
-
استاد حسین غفاری اردبیلی
ارسال دیدگاه