باتدي محرابيده القانه علي شيرخدا
اولدي برهم بيله بيرظلميله اركان هدي
سس دوشوب حيدرين احوالي پريشان دي گلون
شيرحق ياره لنوب قانينه غلطان دي گلون
الغرض مسجده گلدي ايشيدن بو خبري
گورديلر قانه باتوب شيعه لرين راهبري
قويديلار كهنه گليم اوسته عليني حسنين
باش طرفده حسن آغلور آياغ آلتيندا حسين
گتديلر منزله ساري شرف آيينه سيني
ضرب خنجر آقانين تنگ ايلدي سينه سيني
حال به حال اولدي بو مدتده علي ميرهدا
واريري عرش خدا بو غمه ويرانه اولا
ناگهان هوشه گليب بيلدي علي جرياني
ديدي اجرا ايليون بو ديديگيم فرماني
اوز اياقيمله قويون تا كي گيديم منزليمه
سالماسين فوج محن آيري بير آتش ديليمه
سالميون غملي علينون يره الان سوزيني
اولدورر گورسه بو حالدا مني زينب اوزيني
يري وار عرض ايليم بوسوزي شاه نجفه
سسلدون (فُزتُ ) يتيشدون متعالي هدفه
دوزمدون سن ولي زينب يارووي باشدا گوره
او آخان قانووي باشدان گوزيله قاشدا گوره
هاردا قالموشدون اوگون زينب فرخنده شيم
تليدن قتلگهه ناله كنان قاشدي او دم
ياحسين ديلده مدام اشكي ياغاردي خانمون
تليدن قتلگهه زلفي آغاردي خانمون
بيرچوخور يرده گوروب قارداشي عريان يخلوب
نيزه اوخ ايليوب اعضاسيني شان شان يخلوب
بيرطرفدن ده گلور مقتلينه شمر دني
ايستيور ظلميني ايتسون او مزوّر علني
الده شمشير چخوب ميرهدا سينه سينه
چالينوب سنگ جفا معرفت آيينه سينه
گوردي بو منظره ني غيرتي جوشدي خانمون
رگ ده كي حيدري قاني گينه داشدي خانمون
ال آتوب خنجرعريانه شهامتله خانيم
ديدي عالم بيله بو قارداشا قرباندي جانيم
كشمكشده نه ديوم اولدي نلر اهل عزا
بير تكان خنجرينه ويردي او بي شرم و دغا
او چوخور يرده حسين ناظريدي كشمكشه
عار اولا چرخ جفا پيشه ده بو كج روشه
يري وار منظره ني اهل ديل آلسون نظره
انورين يازديغي سوزدن بيزه اولسين ثمره
(عشقينون ياره لي شه باخدي غم آيينه سينه
آخدي زينب الينون قاني حسين سينه سينه)
(آذرين) غملي سوزي سعي ايله آهسته دينن
مقتلين روضه سي جانسوزيدي سربسته دينن
- جمعه
- 26
- دی
- 1399
- ساعت
- 19:11
- نوشته شده توسط
- یوسف اکبری
- شاعر:
-
ودود آذرین خلخال
ارسال دیدگاه