ناگه بیر اوخا اولدی نشان قلب شهنشاه
اوخ بوسه وران یرده ظهور ایلدی الله
الله کیمین اولدی حسین ذوالمن و ذیجاه
آتدان یخیلان لحظه چکیب زینبی بیر آه
دیندیردی او آهیله شه تشنه لبانی
سسلندی حسین سینه می اوخ گور نئجه یاردی
قلبیمدن اوغول صحبتینی گوتدی آپاردی
ایندی بو یاریلمیش اورگین مالکی یاردی
کیم دی که حسینین حرمی خیمه سی واردی
وار حضرت جانانیدی باقی همه فانی
سالمیشدی صدا گویلره اول وجه الهی
گلدی او صدانی کسه بیر مست مناهی
گوردی کسه بیلمور سسی کسدی سر شاهی
آری سر احراری کسر فتنه سپاهی
خاموش ائده بیلمز ولی مصباح هدانی
کسدی اوباشی خوار ائده تا نیزه ده اوباش
اوباشی ولی ایلدی رسوا او کسوک باش
عابدلر ائدیب قاشلارینا جانینی شاباش
عاشقلره آلنیندا هو الله گورونوب فاش
اثبات ائدیب اعدایه فلا تنتصرانی
عرض ائتدی سما اهلی او خونین باشا هر آن
اجلالوی گر بیلمدی یر اولما پریشان
بیر لحظه گویه باخسون اگر ای شه خوبان
سگیز گوزینی دورد ملک ایلر سنه قربان
- پنج شنبه
- 9
- بهمن
- 1399
- ساعت
- 23:31
- نوشته شده توسط
- یوسف اکبری
- شاعر:
-
عسگر شاهی اردبیلی
ارسال دیدگاه