گر ايسته سوز تاپاسوز هر ايکی جهاندا نجات
ديون محمد و آل محمده صلوات
گئدوبدی رفرفيلن گويلره رسول انام
گوروبدی عرشيده وار اون ايکی امام همام
کی اون بيری اوتوروبدور بيری ائدوبدی قيام
به ياد اون ايکی نور و به نور مه وَجَنات
ديون محمد و آل محمده صلوات
علی وصی بلا فصل مصطفادی بيلون
تمام شيعه لره اولين آقادی بيلون
نجفده اول آقانین قبری با صفادی بيلون
اونون اَليله اولوب محو، لات و منات
ديون محمد و آل محمده صلوات
جناب فاطمه نون آدينه اولوم قربان
همان او فاطمه کی قلبینی ائدوبلر قان
گونوز ئولوب، گئجه دفن ايليوب شه مردان
وئروبدی فاطمه نون آدينه خدا برکات
ديون محمد و آل محمده صلوات
گوزل آقادی امام حسن بقيعده ياتوب
جفای زهريله مظلوم ئولن بقيعده ياتوب
فدا اولوم او غريب وطن بقيعده ياتوب
مزاری گون قاباقيندا قالوبدی چوخ سَنَوات
ديون محمد و آل محمده صلوات
ديار کرب و بلانی چوخ ايستيور گوگلوم
شهيد تشنه لبانی چوخ ايستيور گوگلوم
ابالفضل آدلی آقانی چوخ ايستيور گوگلوم
گرکدی گوزياشيم آخسين عُذاره مثل فُرات
ديون محمد و آل محمده صلوات
امام زين العبادين وفاسينه قربان
گوزل یوزينده او نورِ جلاسينه قربان
نماز و راز و نياز و دعاسينه قربان
اولوبدی شاهد اونون هر دعاسينه خَلَوات
ديون محمد و آل محمده صلوات
امام باقره قربان اودور بئشمجی امام
جناب جابره امر ايليوب رسول انام
يتور منيم طرفيمدن اونا، گورنده سلام
همان اماميدی که اولدی شافع عرصات
ديون محمد و آل محمده صلوات
دولوبدی عشق ولائيله قلب اَطيَبيميز
هامی مکاتيب ايچينده گوزلدی مکتبيميز
امام صادق اولوبدور رئيس مذهبيميز
ائدوبدی شيعه لرين حقّينی جهاندا ثبات
ديون محمد و آل محمده صلوات
بيزی ائدوبدی خدا شمع عشقه پروانه
گرک اورکلريميز غمده اود دوتوب يانه
امام موسی کاظم دوشوبدی زندانه
تاپوبدی خالق يکتا يانيندا چوخ درجات
ديون محمد و آل محمده صلوات
وئروبدی زهريله جان حضرت امام رضا
دوادی دردلره اول تُربت امام رضا
اورکده نيسگيل اولوب غُربت امام رضا
اونی زيارت ائدن کس گورر بوقت ممات
ديون محمد و آل محمده صلوات
خدايه شکر اولا کی شيعه و مسلمانم
سخا و جود امام جواده قربانم
هميشه سفره ی جودينده منده مهمانم
قيامتين گونی آلاّم اَليمه برگ برات
ديون محمد و آل محمده صلوات
امام هادی اونومجی اماميميزدی بيزيم
سپهر عشقيده بدر تماميميزدی بيزيم
اونون مرامی جهاندا مراميميزدی بيزيم
وئرر مُحبّ لره لُطف حقدن آب حيات
ديون محمد و آل محمده صلوات
امام عسکرينون روحينه اولوم قربان
چکوبدی چوخلو جفا يا ديوم چکوب زندان
تاپالاّ اهل ولا، سُرَّمَن رَآده نشان
او حضرت ايلدی اسلامه چوخ گوزل خدمات
ديون محمد و آل محمده صلوات
گوزللرين گوزلی حضرت امام زمان
او حضرتين يوزونون نورينه بپادی جهان
اگر چه گونتک عياندی ولی اولوبدی نهان
ئوپور قدملرينی ايلده وادیِ عَرَفات
ديون محمد و آل محمده صلوات
بو شعره بانی محمّد، مرادی اولدی، ولی
کمک ليق ايلدی الحق علیّ و آل علی
«بشير»ه وار اولارین لطفی هر زماندا بلی
تاپار يقين ايکی دنياده کلّ شيعه نجات
ديون محمد و آل محمده صلوات
اللهم صل علی محمد و آل محمد
- چهارشنبه
- 22
- بهمن
- 1399
- ساعت
- 21:41
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه