سلام او لاله لی گُلشنده سرو آزاده
که هشتاد آلتی ایل عمر ایلیوب ولی ساده
امامه قول شرف ویرمیشیدی ، ایتدی عمل
باشا یتوردی ئوز عهدین او مرد آزاده
شهادتیله دئدی حاکمان منطقیه
کیشی دگول باشینی هر کس اگسه جلاده
حضور یاره گئدوب نایب امام زمان
گلوب نوایه خمینی بهشت زهراده
دوشوبدی یاده شکوه نماز جمعۀ نصر
قوجاقلیوب دیزیمی آغلارام مصلاده
خدا ، بو خامنه ای دی؟ وَ یا خمینی دی؟
نجه بونی تانیوم وضع اِرباََ اِرباده
ایوین خراب اولا ای ایرانا اولان بدبین
اوتور یرونده که سن قطره سن بو دریاده
قسم خمینیه ، ئولمز امام خامنهای
ایکیسی ده دیریدی ،جلوه ده، تجلّاده
بو ایکّی سیّده کیم جانشیندی، جاندی بیزه
گئدیب الین ئوپوب اوللوخ جهاده آماده
علی نون اوغلی حماسه یاراتدی ایراندا
که هر یانا باخوسان کربلا دوشور یاده
اولیدی کاش بو جمعیت عصر عاشورا
غریب امامه ائدیدی کمک او صحراده
جنازه بیر حالا قالمیشدی اول چوخور یرده
که باخماقی چتین اولدی امام سجاده
امامه ویردی تسلیٰ علی قیزی زینب
که قارداشیم بالاسی گلمه آه و فریاده
بیوردی عمه منی آغلادان بو منظره دی
یانور یانان اورگیم نار ظلم و بیداده
بو اهل کوفه بوکور ئوز ئولنلرین کفنه
ولی بابام قالیب عریان بو سوز گرماده
بویوردی آغلاما قارداش بالاسی غصّه ییمه
گئچر بو غم گونی، آیندیه باخ ، ایستاده
او تلّین اوسته چخان آخرالزمانی گورر
حسین قانی یارادار انقلاب دنیاده
سلام او صبره، ای آینده بین اولان زینب
گل ایرانا که گلوب زینبیلر امداده
وفالی شیعه دیور موشک آلتدا یازهرا (س)
قوشون چکوب حرمه دشمن حرامزاده
سپاه حق علی و فاطمه آدیلا چخوب
جهاد اعظمه ، فاتحدی حق بو دعواده
حسینی اولسا شهادت ، اسارتی اولماز
بونی خمینی یازیب دفتر تولّاده
مقدّمات ظهور ای خدا فراهم اولوب
ئوزون یتور صلواتیله مهدینی داده
(کلامی) هم دئ سوزون هم ادای تکلیف ائت
که تبیین اولماسا ایمان و دین گئدر باده
- دوشنبه
- 21
- اردیبهشت
- 1405
- ساعت
- 0:8
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه