علی سنه فدا آنان، من آغلورام سن آغلاما
بو قدری ائیلمه فغان،من آغلورام سن آغلاما
سن آغلویاندا آغلوری،یِرین بوتون بولاقلاری
پوزور سنین بو شیونین،خیامیده اوشاقلاری
سکینه جان بِسر اولور،گورنده بو دوداقلاری
باجون اولوبدی باغریقان،من آغلورام سن آغلاما
رقیه زهرچاک اولور،او تشنه دلبر آغلوری
بی بین دیزین قوجاقلیوب،اولوبدی مضطر آغلوری
سن آغلویاندا عرشیده،یانیر ملکلر آغلوری
دئیور سماده عرشیان،من آغلورام سن آغلاما
نه واردی سینه ده صودم، نه واردی مشک لرده سو
بویاندا یوخدی جرعه سو،اویاندا یوخدی آبرو
نه واردی بیر نفر دئسون،عطشدن اؤلدی ماهرو
نه چاره ائیلیوم دایان،من آغلورام سن آغلاما
سنین بو ناله ن ایلدی، داغا داشا اثر بالا
اولور منیمده زحمتیم،یواش یواش هدر بالا
سنه آنالیق ایلدیم،غریبه صودامر بالا
بو آلتی آی اولور یالان،من آغلورام سن آغلاما
دئمم آنالیق حقینه،منیله بیر دانیش اوغول
دئمم بو گیر و داریده،اوشاقلارا قاریش اوغول
سنی رقیه نین جانی، ربابیله باریش اوغول
بو غمکشه اولوب اولان،من آغلورام سن آغلاما
دئیردیم هی خانملارا،بو تِزده دیل آچار بالام
قوناق گلنده عمه سی،قباقینه قاچار بالام
اؤپنده غنچه وش ئوزون،باشینا گول ساچار بالام
یالان اولور سوزوم اینان،من آغلورام سن آغلاما
- یکشنبه
- 3
- اسفند
- 1399
- ساعت
- 23:1
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه