گوشه ی ویرانیه ویرموسن الحق صفا
قانلی دوداقلاریوا غملی رقیّه ن فدا
کُنج خرابه بابا حسرت فردوس اولوب
بسکی اورک شاد اولوب اشکیله دیده م دولوب
سویله یارالی گوروم ،پیکریوه بس نولوب
باشیله باش چکموسن ،سن بیزه ای باوفا
قانلی حَنانی یاخوب ، کیم بو رُخ اَنوره
کیم منی ایتدی یتیم ، سالدی بیله چوللره
تیغ جفانی چکوب کیم بو سوسوز حنجره
عالمی ویران اولا سن هارا خنجر هارا
چرخ دَنی هر نه غم ،واردی توکوب باشیمه
عمّه مه تاپشور یازا حالیمی باش داشیمه
گَل دیله دیللن دانیش رحم ایله گوز یاشیمه
طاقتیم الدن گیدوب ، دینمه سن ئوللم بابا
نازیله سیننده من چوخ گجه لر یاتمیشام
ایندی خرابه یرین اشکیله ایسلاتمیشام
چوخ گجه دیسگینمیشم ، عمه می آغلاتمیشام
سندن اوزاق دوشموشم ،اولدی جلالیم فنا
یوخدی سوزوم عاشقین ،اشکی آخار دامنه
ویردی زمانه ولی ، زحمت بیجا منه
یولدا بابا شمر دون سیلی ووراندا منه
حقدن ئولوم ایستدیم ،ای شه گلگون قبا
دامن وصلون دوشوب ، زحمتیلن چون اَله
وصلیمیزین صحبتی،قوی دوشه دیلدن دیله
قال بو گجه نعشیمی ،عمه میلن دفن ایله
هجریوه یوخ طاقتیم ، ای گُل باغ ولا
سن بابا آغوشیوه ،دائم آلاردون منی
سینن اولاردی منه ،خُلد بَرین گلشنی
آلمیشام آغوشیمه ، ایندی ولی من سنی
دوندی دونَرگم داخی،شغلوم اولوب آه و وا
یاندی رقیّه ز بس ، آغلادی کُنج قفس
گوردی حَرَم لر داخی ، دوشدی صدادن جَرَس
چکدی دَریندن بیر آه،یومدی گوزون باتدی سَس
بیر طرفه باش دوشوب،بیر یانا دیلسیز بالا
قاچدی قوجاقه اودم ،عمه سی آلدی قیزی
ایتدی خطاب آچ گوزون،سفره ی عشقین دوزی
سسلدی سَس گلمدی ، بولدی باتوب اولدوزی
مقصده چاتدون دیدی، یات سنه عمّه ن فدا
(بیکَس) الوندن دوتوب خالق حیّ و قدیم
شامل ایدوب حالیوه ،لطفونی ربِّ علیم
شعریوه بانی اولوب ،یار صدیقون (کریم)
باهم اولار قسمتوز، بیر سفر کربلا
- شنبه
- 23
- اسفند
- 1399
- ساعت
- 19:32
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه