ای بشر فکریوی محکوم اسارت ائله‌مه
روحون آزادیه مایلدی ملامت ائله‌مه
بشرین ارزشی حیثیّت و شخصیّتیدی
ساخلا حیثیّتووی٬ غرق کراهت ائله‌مه
الله ئوز روحینی جسمونده امانت قویدی
شرفون اولسا امانتده خیانت ائله‌مه
ساتما وجدانو وی هئچ منصبه هئچ مرتبیه
عزّت نفسیوی آماج ذلالت ائله‌مه
حق یئمه حقّیویده قویما یئییه هئچ بیرکس
بیرده کی آل محمدله عداوت ائله‌مه
دین اسلامی پیمبر بیزه شفّاف ائلیوب
حکم شفّاف شریعتده نیابت ائله‌مه
شکلیدن شکله سالوب حکم رسول‌اللهی
تازه احکامووی بو خلقه قداست ائله‌مه
عمل اِیله اَوَل احکامه صورا ایله دعا
قوری بیر راز و نیازیله ریاضت ائله‌مه
متن قرآنه عمل اِئتسون اگر عابدسن
هی یالانّان منه قرآنی تلاوت ائله‌مه
سن خلوصیله ایکی رکعت اوخی گونده نماز
یئتمیش ایل ریب و ریائیله عبادت ائله‌مه
جَبریلن جنّته داخل ائله‌مه بنده‌لری
ذات قدّوسین امورینده وکالت ائله‌مه
الله ئوز بنده‌سینین ائتدیگینه ناظردی
سن نماینده اولوب ، دینه دخالت ائله‌مه
- شنبه
- 7
- فروردین
- 1400
- ساعت
- 13:16
- نوشته شده توسط
- یوسف اکبری
- شاعر:
-
علیرضا امانی مجد
ارسال دیدگاه