بيرگون ديوردى آدم و حوّا بهشتيده
بيزدن مگر گوزل، اولار آيا بهشتيده؟
سير ايلیورديلر ايكي سى شور و شوقيلن
ناگه گؤروبله صحنه ی زيبا بهشتيده
بير چهره، واردى نورى ائدور خيره گوزلرى
گؤرجك اولوبلا محو تماشا بهشتيده
عرض ائتديلر: بيان ائله اى خالق جهان!
آيا كيميندى بير بئله سيما بهشتيده؟
باشينده تاج واردى تجلاّى عشقدور
اولدوق او تاجه عاشق و شيدا بهشتيده
بير جوت قولاقلاريندا ايكى گوشواره وار
خضرادى صاقدا، صولدا كى حمرا بهشتيده
كيمدور بئله جلاليله وار شأن و شوكتى؟!
دؤرين آلوبدى يكسره حورا بهشتيده
كيمدور بو جلوه صاحبى حيران ائدوب بيزى
سايه سالیبدى باشينه طوبا بهشتيده
يارب بيزه تانيدّير اؤزون، سرّى فاش ائله
لاينحل اولميا بو معمّا بهشتيده
ائتدى مخاطب آدم و حوّانى بو, ندا
گويا بويوردى خالق يكتا بهشتيده
سالار بانواندى بو، محبوبه دور منه
من عاشقم بونا بودى زهرا بهشتيده
كلّ عوالمى بونا خاطر ياراتیمشام
اولموش بو اؤزگه رتبيه دارا بهشتيده
تاجى كه وار باشيندا علی دور, او اولماسا
حاشا اولا بو كوثره همتا بهشتيده
اوغلى حسندى صاق قولاقينداكى گوشوار
اولموش گوزلّيگيله دل آرا بهشتيده
صول گوشوار حسيندى گوزلدورحسن كيمى
اؤنلاردى همچو لؤلؤ و لالا بهشتيده
نور عالمينده چوخدان اولار، من ياراتمشام
آل عبانى، رأسده طاها بهشتيده
حوّا و آدم اؤنلارين آدين ائدوبله ذكر
معنا تاپوبدى علّم الاسما بهشتيده
بيرده سؤال ائدوبديله گوشوارهلر، ندن
چون لاله دور بيرى، بيرى خضرا بهشتيده؟
بیر دقّت ايليون او سؤالين جوابينه
فرمايش ائتدى حىّ توانا بهشتيده
اُول ايكّى رنگين علّتينى ايلسم بيان
قالماز دوام و صبر و شكيبا بهشتيده
بير گوشواره صاق قولاقيندا ياشيلدى، چون
زهر جفانى ايلورى معنا بهشتيده
يعنى حسن شهيد اولاجاق زهركينه دن
آغلار فرشته لر اونا حتّى بهشتيده
بير گوشواره قرمزيدى صول قولاقيده
تشریحی قويمورى قالا يارا بهشتيده
كرب وبلاده يعنى باتار قانينه حسين
هر قلبه يوز وئرر غم عظما بهشتيده
دنياده ياس دوتوب اونا هر كيمسه آغلاسا
وئرّم او شخصه مسكن و مأوا بهشتيده
يارب «بشيری» اهل تولاّ حساب ائله
ساکن اولار چون اهل تولاّ بهشتيده
عفو ايله، ايليوبدى خطا، دار فاني ده
بلكه حمايت ايليه مولا بهشتيده
- یکشنبه
- 15
- فروردین
- 1400
- ساعت
- 20:59
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه