پيش واقعه
گيوبدى شيعهلر آللَّه قرا اروشلوقدا
دوتوبلا مجلس و بزم عزا اروشلوقدا
توكولّه گوزياشينى دامَنه يانايانه
ائدولّه نى كيمى غمدن نوا اروشلوقدا
چكوبله قاره گنه هر مكانه آهیله
كه يعنى ياسلىدى ارض و سما اروشلوقدا
دولوبدى مسجد كوفه غم و ملاليلن
على على ديورى ماسوا اروشلوقدا
نماز صبحى قيلاندا يارالانوب باشدان
باتوبدى قانينه شيرخدا اروشلوقدا
«بشير» باشلادى نظمه چكه بو تعزيهنى
بو مجلسه چاغرور هم حسينى هم حسنى
شيخ اوّل
اى شيوخ نهروان آگاه اولون
ائتميون آه و فغان آگاه اولون
پيشنهاديم وار سيزه بير گوش ائدون
بوشليون دينى، شرابى نوش ائدون
اوچ نفر قويمور اولاق غمدن خلاص
بير على بير معاويه بير عمروعاص
هر اوچى گر ئولمسه واى بيزلره
اى واى اى واى اى واى اى واى بيزلره
شيخ دوّم
دوز ديور، اونلار بيزى بدبخت ائدوب
اونلار آسان ايشلرى چوخ سخت ائدوب
هر اوچى ئولسون گرك احيا گونى
بيزده بير راحت اولاق سودا گونى
ايندى اعلان ايله سين خُرد و كبير
كيمدى ئولدورسون اولارى بير به بير؟
عمروبن بكر
بيلون عمرو بن بكرم من شريرم
شجاعت بيشه سينده مثل شيرم
اؤزوم آمادهيم آند اولسون عصره
بو نيّتلن گئدم تا شهر مصره
گرك حيران قويام بو عام و خاصى
او يئرده ئولدورم من عمروعاصى
بركةبن عبداله
ايا گروه خوارج اولون بوگون آگاه
آديمدى هامّى بيلور بركة بن عبداله
كه منده داوطلبم تيغ تيزيمى گوتورم
اوزيمى شامه او وقت مقرّره يئتورم
او مسجد اُمَوي ده وجود معاويه نى
كثيف قانينه غلطان، ايليم علنى
شيخ دوّم
ايندى كيمدى تا گئدوب شير خدانى ئولدوره
مسجد ايچره جانشينِ مصطفاني ئولدوره؟
كيمده جرأت وار ديار كوفيه سارى گئده
آللَّها خاطر علينى یئر اوزوندن محو ائده؟
ابن ملجم
آديمدور ابن ملجم من دغايم
شقي نون اوغلى اشقى الاشقيايم
ديار كوفه ده قان ايلرم من
علي نى قانه غلطان ايلرم من
گركدور ئولدورم من مرتضانى
قويام آغلار هميشه، شيعيانى
ابن ملجم
كوفيه آز قالورى داخل اولام
هدف و مقصديمه نايل اولام
گَتوروب ملّتى چون جانه على
پس گركدور باتا القانه على
ابن ملجم
به به نه گوزل شهريدى بو كوفه ديارى
شهرتده ازل شهريدى بو كوفه ديارى
به به نه گوزل منطقه دى باغلارى عالى
گلزار و چمندى باشاباش چوخدا صفالى
بير ائو گؤرونور گؤزلريمه چوخ متعالى
بير آى دولانور اوردا كه يوخ گؤيده مثالى
ابن ملجم
گئدوم او ائوده بير آز آللَّها عبادت ائدوم
صباح اولونجا او يئرده قُران قرائت ائدوم
قطام
گون باتان چاقى شتابان قاپونى كيمدى دووَن؟
گئت گؤر اى دازقلى وردان قاپونىكيمدى دووَن؟
وردان
آديوى ايله بيان من تانيوم
يوزيوى ائتمه نهان من تانيوم
نه سؤزون واردى منه ايله بيان
چك يوزوندن او نقابى بو زمان
ابن ملجم
آديم ابن ملجم، اوزوم خسته يم
مسلمانم آللَّهه دلبسته یم
بو ائوده قويون استراحت ائديم
اوروشلوقدى قرآن تلاوت ائديم
وردان
آلنّوندا موهور ردّى علامتدى بويور گَل
تسبيحون اوزون، سقّلون آفتدى بويور گَل
ائو صاحبى اُول بانوى زيبادى ایا شیخ
من نوكرىام اول منه اُولی دى ایا شیخ
گئت اوندان اجازه اوزون آل زاده ی ملجم
منده سنيلن باهم اونون يانينه گلّم
ابن ملجم
السّلام اى بانوى عالى مقام!
گلميشم بوردا سنه مهمان اولام
اى قطام آيا ندندى آغلوسان
آتش آهيله سينه داغلوسان؟
قطام
خوش گلوبسن ابن ملجم بو ائوه
چوخ زماندور كه دولوب غم بو ائوه
نهروان جنگينده اى مرد پليد
هم آتام هم قارداشيم اولموش شهيد
اونلارى ياد ايلدوقجا آغلارام
ياسليام من باشه قاره باغلارام
ابن ملجم
ايلوسن جارى يوزه گوزياشيوى
ئولدوروبدور كيم آتا، قارداشيوى؟
قطام
بيله بولمه ابن ملجم، شاه عادلدور على
شاه ظالمدور كه مظلوملاره قاتلدور على
ايليوب تيم الرّبابه قومينى بير بير شهيد
من او گوندن قالموشام بو ائوده تنها و وحيد
ابن ملجم
ايا قطامه بو يئرده سنه كه دوشدى گؤزوم
نمازى ترك ائله ديم حُسنوه وريلديم اوزوم
سنون جماليون آلوب دين و عقليمى الدن
بو قدّ و قامتيوه من وريلموشام ديلدن
گوزلّر ايچره سنى بى مثال بيلّم من
منيله ايلمه سون ازدواج، ئولّم من
قطام
ايندى كه عاشق اولوبسان سن منه اى بد مزاج
اوچ دنه شرطيله سنلن ايلرم من ازدواج
ابن ملجم
نه شرطون اولسا باش اوسته عيان ائت
اوركده ساخلاما بير بير بيان ائت
قطام
اوّلى اوچ مين درم پول اى عزيز
ايكّمنجى بير غلام و بير كنيز
اوچّومنجى سهميلى طوفانيدور
يعنى مهريّهم علينون قانيدور
ابن ملجم
اى قطامه كيمدى اُول مير ولانى ئولدوره؟!
هئچ كيمين يوخ جرأتى شيرخدانى ئولدوره؟!
آند اولا هم جانيوه هم جانيمه اى خوش خرام
من على بن ابيطالب آديندان قورخورام
قطام
قوتما اى ملعون نظردن سالمارام
من ايكى شرطيمى سندن آلمارام
تك بودور شرطيم اونى ئولدورگيلن
سن منه اوز عشقوى بولدورگيلن
ابن ملجم
من زنازاده بو دهره گلموشم
بيل بو نيّتله بو شهره گلموشم
آلموشام شمشيريمى مين درهمه
مين درمده وئرموشم زهر غمه
ياخشى سودا ايلديم سودا گونى
شرطيوى اجرا ائدم احيا گونى
وردان
ايا ابن ملجم رفيقم سنه
گوزيوى آچوب باخگيلان بير منه
بو قطّاميه فخريلن نوكرم
سنه من بو ايشده كمك ايلرم
شبيب
منده بو ايشده سنه يار اولارام
گرچه ياخچى بيلورم خوار اولارام
من عداوت سوونين چشمه سىام
او علي نون قانينون تشنه سىام
ابن ملجم
ايكوزده وئرون دست بيعت منه
بهشت اهلى سوز يوخدى منّت منه
گئدون حقّ اوزى ياور اولسون سوزا
اوروشلوق قويون چاتسين اون دوقّوزا
امام اوّل
ازلده حضرت پروردگاره حمد اولسون
خداى لم يزل و كردگاره حمد اولسون
اوروشلوق آيىدى بو، ماهِ صوم و ماه صلات
ديون محمّد و آل محمّده صلوات
اوروش دوتون يادوزا آجلارى سالون ياران
فقيريلر حالينى چوخ خبر آلون ياران
اوروش دوتان گئدهجاقدور بهشته عقباده
اوروش ييَن قئره اوزدور هر ايكّى دنياده
گر ايسته سوز تاپا سوز هر ايكى جهاندانجات
ديون محمّد و آل محمّده صلوات
امام اوّل
اوغول حسن دور اياقه دوشوبدى باشيمه شور
بيان قيل كه بو آيدان نئچه گونى سووشور؟
امام دوّم
فدا اولوم سنه اى آللَّهين ولىسى بابا
بابام رسول امينون ازل وصىسى بابا
سؤاليوين باباجان بو زمان جوابى بودور
بو آيی ين اى شه عالم، اون اوچ گونى سووشور
امام اوّل
اوغول حسين دور اياقه منه زمان آزالير
بيان، ائله که بو آيدان گوروم نقدرى قالير؟
امام سوّم
سنه قربان اولوم اى شاه عالم
جمالون گون، جبينون ماه عالم
اوروش آللَّهين امريدور توتولسون
قالور اون يدّى گون بو آى قوتولسون
حسنين
نيه سارالدى، جمالون بابا
بيزى آغلاتدى، سؤالون بابا؟
غملى باخورسان، مگر نولاجاق
سنه بيز قربان، مگر نولاجاق؟!
امام اوّل
بيلورسوز اى جماعت حقّه يارم
على آديمدى شير كردگارم
بيلورسوز کاتب قرآن منم من
رسول اللَّهه مثل جان منم من
بيلورسوز حامى دين مبينم
بيلورسوز من اميرالمؤمنينم
بيلورسوز جانشين احمدم من
يگانه آفتاب سرمدم من
بيلورسوز رهبر دوران منم من
بيلورسوز مظهر يزدان منم من
بيلورسوز منقبت درياسىام من
علىّام شيعهلر مولاسىام من
امام اوّل
اى شيعهلر بو بحريده طوفانه آز قالور
عمريم چاتا بو دهريده پايانه آز قالور
چكسين قلنجين آز قالورى اشقى الاشقيا
آغ سقّليم بويانه قيزيل قانه آز قالور
اوغلوم حسن حسينه هاموز حرمت ايليون
اولسون يتيم، بو ايكى دُردانه آز قالور
امام دوّم
يا اميرالمؤمنين جانلار فدا اولسون سنه
جان و ماليلن مسلمانلار فدا اولسون سنه
اى باباجان دهريده وآللَّهى اللَّه شيرى سن
نه فقط شيرخداسن آللَّهين شمشيرى سن
كيمده وار جرأت سنه سارى قلج چكسون بابا
كيمده وار قدرت يئر اوسته قانوى توكسون بابا
امام اوّل
بو كوفه مسجدينه، باشيمين آخار قانى
ائدر او قان ولى تضمين، دين و قرآنى
بيلون كه قاتليمين آدى ابن ملجمدور
قيامتين گونى حتماً يئرى جهنّمدور
امام دوّم
قارداش حسين سن آغلاما
آهيله سينه داغلاما
زينب ائشيتسه بو سوزى
آغلار گئجيله گوندوزى
امام سوّم
قارداش حسن اى مجتبي
سال قولاّريوى بوينوما
ايكى قارداش قوجاقلاشاق
دويونجا باهم آغلاشاق
امام اوّل
اى كوفه نين جماعتى بو گوزياشا باخون
دقّتله صاق صولومدا ايكى قارداشا باخون
مندن صورا حسينيمه چوخ حرمت ايليون
بير گون گلر، او گونده هاموز دقّت ايليون
پيغمبرين بالاسيدى واللَّهى بو حسين
منع ائتميون فراتى دییَن وقته سو حسين
امام اوّل
يارب به حقِّ، ثارِ ثارُاللَّه
جمع:
آمينَ آمين، آمين يااللَّه
ائتمه شيعه نى دوزيولدان گمراه
جمع:
آمينَ آمين، آمين يااللَّه
ياربّ به حقّ طاها و زهرا
جمع:
آمينَ آمين، آمين يااللَّه
سربلند ايله هر ايكى دنيا
جمع:
آمينَ آمين، آمين يااللَّه
مريضلرينه يارب شفا وئر
جمع:
آمينَ آمين، آمين يااللَّه
هر دردلرينه يارب دوا وئر
جمع:
آمينَ آمين، آمين يااللَّه
امّ كلثوم
شكر اولسون آللَّها منه مهمان گلور بابام
جانيم بابام گلن يولا قربان، گلور بابام
احيانين اوّل آخشامى افطاره آز قالير
بولمم ندندى حالى پريشان گلور بابام
امّ كلثوم
سلام اولا سنه اى شاه انس و جان بابا
آنام كيمى منه دنياده مهربان بابا
دوباره كلبه ي كلثومي ايلدون گولشن
گولينه باش چكر البته باغبان بابا
امام اوّل
قوناقوم بو گئجه اى قيزيم عليكِ سلام
يواش يواش آزالير قورتولا بو ماه صيام
آتا وظيفه سيدور باش چكه بالالارينا
عزیز قیزیم! سحر آللَّهيمه قوناق اولارام
امّ كلثوم
يارب ائويم غريبه چراغاندى بو گئجه
عشق عندليب لرينه گولوستاندى بو گئجه
هر بير گئجه اولوردى بير اولادينه قوناق
نوبت چاتوب بابام منه مهماندى بو گجه
امّ كلثوم
من فدا اولاّم بابا گوزياشيوه
بو گئجه ياتمام دولانّام باشيوه
قوى قدم رنجه بابا افطار ائله
سُفرهمى غرق يَمِ انوار ائله
امام اوّل
بو سفرهده گورورم ايكّى جور غذانى قيزيم
فراموش ايلمه مسكين و بينوانى قيزيم
مگر گوروبسن آتون ايكّى جور طعامى ييه
مگر گوروبسن على پُربها لباسى گيه؟!
امّ كلثوم
كاملاً فرمايشون دؤزدي بابا
سفرهده بير سوتدى بير دوزدى بابا
امام اوّل
يتيم لر آتاسى مرتضايم اى كلثوم
فقيرلر آقاسى پيشوايم اى كلثوم
دوزيلا من آچارام افطارى بو جامى گوتور
قاباقجا بو سوتى بير عدّه بينوايه يتور
امّ كلثوم
سنون كيمى بابا بير مهربان هاياندا اولار؟
هميشه ياده فقيرى سالان هاياندا اولار؟
امام اوّل
واردور يئرى هر دمده چكم ديلدن آه
لا حول و لا قوّة الاّ باللَّه
امّ كلثوم
بابا نيه بو گئجه بير دقيقه ياتمورسان
باشوندان عشق وصال نگارى آتمورسان
كئچوبدى يارى گئجه آز قالور اذانه بابا
دونوبدى رنگ رُخون رنگ زعفرانه بابا
امام اوّل
وقت اولوبدور امّ كلثوم! مسجده سارى گئدم
تا ياتانلارى نماز صبحه من بيدار ائدم
داى يولومى گوزلمه چونكه گلنمم بيرده من
ذوالفقارى جان كيمين كربوبلايه ساخلا سن
زبانحال مرغابى ها
اى آللَّها يگانه ولى گئتمه مسجده
وى شير حىّ لم يزلى گئتمه مسجده
گئتسون سنى شهيد ائلير اشقى الاشقيا
ائوده نمازيوى قيل على گئتمه مسجده
امام اوّل
اى جَنان قوشلارى سيز آغلاميون
آتش آهيله ديل داغلاميون
ديوسوز گئتمه، ولى گئتمهلىام
ردّ اولون سيز يولومى باغلاميون
زبانحال حلقه در
عاليدى ياعلى ئولومه همّتون سنون
چوخ چوخ چتيندى ماخلقه فرقتون سنون
گئتمه بو دفعه مسجده ائوده نماز قيل
ديلسيزلرى گتوردى ديله محنتون سنون
جبرئيل
سلام اولا سنه اى شاه عالم امكان
اذان سسيوه اولا جان جبرئيل قربان
اذان دئمه اوجادان ائتمه عالمى دلخون
اويانماسين يوخودان ابن ملجم ملعون
امام اوّل
اوزو قويلى ياتما ظالم، دور اياقه گل نمازه
بيلورم عدو اولوبسان، او خداى بىنيازه
بيلورم نهگيزلهدوبسن بو عبانين آتدا شيطان!
يتشوبدى وقت مُوعد، چاتاسان مرامه الان
جبرئيل
يتيشدى آفت جان باغبانه واويلا
كه اسدى باد ستم بوستانه واويلا
حسن حسينه ديون مسجده گلون فوری
گلوبدى يئر گووين اهلى فغانه واويلا
يخيلدى دين مبينين ستونى مسجدده
اوجالدى ناله سسى آسمانه واويلا
بو ماجرادن ائدون باخبر اباالفضلى
ديون كه شيرخدا باتدى قانه واويلا
حسنين و عباس
سنه خنجر وردى كيم؟ آى بابا جان بابا
ايلدى بيزى يتيم، آى بابا جان بابا
امام اوّل
اوغول حسن، باغلا منيم، باشيمى آغلاما
صبره دعوت، ايله بنى، هاشيمى آغلاما
امام دوّم
يانّام بابا بو غصّهلى مطلبه مطلبه
آغليارام حُسينيلن زينبه زينبه
امام اوّل
قلبيوى حسين داغلاما آى بالا جان بالا
صبر ايله سنده آغلاما آى بالا جان بالا
امام سوّم
مظلوم بابا درديم چوخدى يتيمم يتيمم
قوى آغليوم آنام يوخدى يتيمم يتيمم
ابالفضل دولدوروب گوزين آى باباجان بابا جان
غيرتدن ئولدورور اوزين آى باباجان باباجان
امام اوّل
حسن حسين كيمى سنده ادبلى سن عبّاس
اليوى خنجره آتما غضبلى سن عبّاس
حضرت عباس
بابا اجازه بويورسون بو تيغيمى چكرم
تمام دشمنوين قاننى يئره توكرم
منه بويور سنى بو حالته سالان كيمدى؟
بالالاريوى بو گونده يتيم قويان كيمدى؟
امام اوّل
منيم غضبلى بالام بو محنده صبر ايله
حسن حسين كيمى عبّاس سنده صبرايله
عبّاس
نئجه گوروم دايانوم قان ايچينده ايندى سنى
نئجه گوروم الى قوينوندا قارداشيم حسنى
چيخوبدى شيعهلرين عرشه شور و شينى بابا
نئجه گوروم گوزى ياشلى آخى حسينى بابا
سنى بو حاليله گورسه اگر باجيم زينب
باخانمارام يوزينه من ايا امير عرب
امام اوّل
صبر ايله اوغول غم و بلايه
گلمه بئله نى كيمين نوايه
زينبله حسينه خاطر عبّاس
شمشيريوى ساخلا كربلايه
اى قارداشينون گوزل وزيرى!
ساخلا نظرونده سن «بشير»ى
- سه شنبه
- 17
- فروردین
- 1400
- ساعت
- 18:48
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه