فرشيده بير ظلم اولوب عرش معلاّ تتردى
بير مصلّى دوشدى توپراقه مصلاّ تتردى
مرتضي ائودن چيخاندا دامنين دوتدى قاپى
يالواروب معناده گئتمه اهل معنا تتردى
كوچه‌ده قوشلار قاباقلادى او صمصام حقى
گوردى امّ كلثوم اُول حالى سراپا تتردى
قوش نه قوش اونلار ملكدى يالوارور گئتمه على
ديلّرى‌جك سويله‌دى انّا فتحنا تتردى
هر زادين فكرين آتوب باشدان به جز عشق وصال
حيدرين عشقينده حيران اولدى حورا تتردى
عازم اولدى دلبر و دلدارينون ديدارينه
آدّمين آتدوقجا آغلادى بو غبرا تتردى
مسجدين اوسته حجازى لحنيلن وئردى اذان
تا دئدى اللَّه و اكبر كلّ دنيا تتردى
لحنينه غبطه ائدوب داود خوش الحان او دم
مات ائدوب راحيلى، حتّى روح عيسي تتردى
وارد محراب اولوب عشقيله فتّاح الحُروب
نورينون گؤردى تجلاّسينى موسي تتردى
بيلمدى محرابدور يا طور سينادور او يئر
گوئيا اَرْنى دئدى ائتدى تمنّا تتردى
باشلادى معراج عشقين حيدر دلدل سوار
شوقيدن اُول «قابَ قَوْسَيْنَ اَوْ اَدنى» تتردى
گلدى كوفه اهلى باشلاندى جماعتلن نماز
ماسوىاللَّه قلبى گلدى درده يك‌جا تتردى
صف چكوب معناده بير عدّه ملك مأموم اولوب
ايلدى بير عدّه‌ده گؤيدن تماشا تتردى
بعضى سؤيلوردى كه حيف اولسون او قدّ و قامته
قدسيان كرّوبيان غمدن هويدا تتردى
بعضى سويلوردى نماز آخرين ايلور ادا
آخرين نيّت ائدنده دست بيضا تتردى
تا اگوب قدّين على ائتسين ركوع آخرين
گلشن و گلزاريده هر سرو رعنا تتردى
اوّلين سجده قوتولدى، شه ايكمجى سجده‌ده
ذكر ائدوب سُبحانَ ربّى روح طاها تتردى
قووزياندا باشينى باش آشدى حوراى جنان
باشه ووردى بى گمان جنّتده زهرا تتردى
اى ديليم لال اول دئمه واضح نه اولدى اول زمان
چون مجسّم ايلديم جسميمده اعضا تتردى
ابن ملجم ايكّى الّى قؤزادى شمشيرينى
ايله‌دى اوندا تزلزل دشت و صحرا تتردى
نعره چكدى ووردى ظالم تيغ زهرآلودينى
جنگ خندقدن قالان زخم مسمّي تتردى
آى كيمين منشقّ اولوب باشى سوزولدى قان يوزه
گول جمالى قانيلن اولدى محنّا تتردى
جبرئيل سسلندى آى مردم بيلون ئولدى على
قان ايچينده بو سوزى ذكر ائتدى مولا تتردى
كعبه‌نين آللّهينه آندا ولسون اولدوم رستگار
قاره گييدى كعبه هم اُول چرخ خضرا تتردى
تتردى داغلار، تلاطم ايله‌دى درياى غم
آشنالر آغلاشوب مسجدده اعدا تتردى
تا خبردار اولدى مولانين گوزل اوغلانلارى
آلديدلار دورين او دمده قانلى مأوا تتردى
باشينى آلدى ديز اوسته مجتبي‌سى باغلادى
آغلادى مظلوم حسين ابر شكيبا تتردى
چكدى شمشيرى غلافيندن ابالفضل رشيد
غيرتيندن سرو تك اسدى او سقّا تتردى
امر ائدوب شيرخدا، چكمه هله شمشيريوى
گوئيا عبّاس تك شمشير بُرّا تتردى
يعنى چكمه تيغوى احياده، عاشوراده چك
كئچدى اون دوقوز ايل اولدى روز غوغا تتردى
روز عاشورائيدى احيا گونون ياده سالوب
غيضيلن شمشير چكدى، قوم ادني تتردى
گه ديورى ياعلى سندن مدد گه ياحسين
حمله ور اولدوقجا حتّى سنگ صخرا تتردى
فورى فتح ائتدى فراتى، چوخ سوسوزلوقدان اونون
پارچالانميش لب لرينه باخدى دريا تتردى
دريا قورتولمازدى ايچسيدى وليكن ايچمه¬دى
اووجونى دولدوردى توكدى دست يُمنا تتردى
سويلدى اصغر سوسوزدى من ايچه بولمم سويى
عكسينى گؤردى سودا اُول چشم زيبا تتردى
مشكينى لبريز ائدوب قصد خيام ائتدى، ولى
سالديلار قولاّرينى، تلّ اوسته آقا تتردى
اوخ وروبلار مشكينه اوخلاندى گويا صاغ گوزى
حشر صغري گورسنوبدور حشر كبري تتردى
مرتضي نين باشى تك باشى بولوندى عاقبت
حضرت زهرا گلوب معناده گويا تتردى
باخدى عبّاسين ياريلميش باشينه ووردى باشا
سسلدى اي واى ابالفضل واحسينا تتردى
كربلا شاهى گلوب قويدى بئلينه اللّرين
واي دئدى سيندى بئليم اول شاه بطحا تتردى
اى وزيريم شاهيوى دور قويما تك ميدانيده
باخدى شاهه اول وزير ماه سيما تتردى
سؤيله‌دى عفو ائت منى قارداش خجالت اولموشام
تا ائشتدى بو سؤزى شاه دل آرا تتردى
درد دل ائتدى گونيلن آى، اُفول ائتدى قمر
گلدى اولدوزلار نوايه چرخ مينا تتردى
فاطمه باخدى ايكى قارداشه بيردن آغلادى
ناله سين جنّتده آلدى جسم لعيا تتردى
آيريلوب گلدى خيامه ييغدى باشه عترتين
خيمهى عبّاسه گلديلر او مأوا تتردى
پايه¬سين چكدى داغيلدى خيمه، قيزلار آغلادى
زينب اي واى سسلدى دنيا و عقبي تتردى
هامّوسى بيردن دئدى ائوميز يخلدى ياحسين
باخدى حسرتلن حسينه پير و برنا تتردى
گوردى زينب حالى پوزقوندور حسينون صبر ائدوب
سؤيله¬دى سن آغلاما عالم سراپا تتردى
ئولميوبدور زينبون قارداش گوتورّم پرچمى
من سنون اولاّم علمدارون،صبایا تتردی
بو گئجه روحُ‌القدس اولدى «بشير»ه هم سخن
كلك لطفيلن بو شعرى ائتدى امضا تتردى
- جمعه
- 20
- فروردین
- 1400
- ساعت
- 22:47
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه