هر کسین عترت و قرآنه محبّت واریدی
باشدا هر لحظه هوای ابدیّت واریدی
ئولمیوب ئولمیه‌جک عترته دوز عاشق اولان
گرچه ظاهرده اونوندا دمِ رحلت واریدی
خوش اونون حالینه کی عُمری اولا خلقه مفید
ئولسه‌ده روحینون هر آنیده رحمت واریدی
شرّیدن شرّ گلر یاخشی دیوبدور قُدَما
خوش اونون حالینه کی خیر ایشه سبقت واریدی
خوش اونون حالینه کی یاتمیا غفلتده مُدام
بیله هر حادثه‌نین عاقله عبرت واریدی
یاتانی موعظه و پندیله بیدار ائلیون
وای اونون حالینه کی ئولمه‌گه غفلت واریدی
ایستورم بیر نئچه جمله علمادن اوخویام
خوش اونون حالینه عالِم‌لره اُلفت واریدی
علمائیله اوتور - دور بویوروب پیغمبر
علِلمین اورگَنماقی‌نین حکم عبادت واریدی
وارث علم رسولان، علمادور علما
هانسی قشرین بئله بیر معنوی ثروت واریدی؟
عالِمین حشر گونی چهره‌سی پُر نور اولاجاق
عِلمینون اجرینه شک یوخدی کی جنّت واریدی
بئش روایت اوخودوم هر بئشی بو مضموندا
عالِمین روز جزا حقّ شفاعت واریدی
بو حقیقتدی حقیقت هامی‌نون یانینده
عِلمینه عامل اولان عالِمین عزّت واریدی
نئجه افضلدی آی اولدوزلار ایچینده گئجه‌لر
عالِمین خلق آرا بیر ایله فضیلت واریدی
سونمیه‌ن شمعدور عِلم عالَمی عالِم، اودی کی
اونا پروانه‌لرینده چوخ ارادت واریدی
اوزیده گئتسه سوزی گئتمیه‌جاق دیل‌لردن
شاعرین بو سوزونون سرّه اشارت واریدی
عالِم واقعی و متّقی ای خلق جهان
جانشین‌دور او امامه هله غیبت واریدی
عالِمین مجلس ترحیمی‌ده مکتبدی بیزه
هانسی بیر مجلسین آیا بئله حکمت واریدی
عالِمین ئولماقی بیر ثُلمه‌دی اسلامه بلی
هئچ نه جبران ائده‌بیلمز اونی، شدّت واریدی
مجلس یاسه گلَن‌لر ائووز آباد اولسون
سوزینی خامه گریزه چکه نیّت واریدی
آغلاسین کرب‌و بلا شاهینه بو مجلسده
هر کیمین باشدا بوگون شوق زیارت واریدی
قبر ششگوشه‌نی گورجک دئدی زینب: قارداش
باجوون باشدا قرا، قلبیده محنت واریدی
اربعینوندی گلوب قبریوی ئوپماقه باجون
باخ بو سجاده کی دنیایه امامت واریدی
قبریدن دور باجوین حالی قارداش خبر آل
سینه‌ده چوخ دئمه‌لی غملی حکایت واریدی
دوزدی کی غملی‌دی قبرون ولی چوخ گورملی‌دی
هانسی قبرین بئله بیر ئوپمه‌لی تربت واریدی
یاحسین سایسیز اولان یاره‌لروندن نه خبر؟
پیکرونده بیلورم چوخلی جراحت واریدی
قیرخ گون اولدی منه قیرخ گون بوکولن قدّیمه باخ
چکمیشم آیریلیقوندان نه مصیبت واریدی
بالالارون هامیسی گلدی رقیه ولی بده
جان وئرینجاق اورَیینده اونون حسرت واریدی
یورقونام سنله دانیشدیقجا حسین دینجلورم
زینبین ایندی دوباره سنه زحمت واریدی
دور بیزیلن گئداق عباسی زیارت ائلییاق
وای منه دیلده اونون دردِ خجالت واریدی
هم سنون قبریوی گول تک ئوپرم همده اونون
هم سنون همده اونون زینبه حرمت واریدی
هروله ایلییرم بو ایکی قبرین آراسین
بورانین مروه - صفادن منه رتبت واریدی
ایستورم ثبت اولا تاریخیده بین الحرمین
بیله‌لر تا بو مکانین نه مزیّت واریدی
ای "بشیر" عالِم عامل اولاسان ارزشی وار
یوخسا ایندی هامی‌نین علم و کتابت واریدی
شعریوین بانی‌سی بو دفعه "خلیلی" اولدی
نئچه ایلدی سنیله قُم‌دا رفاقت واریدی
- یکشنبه
- 22
- فروردین
- 1400
- ساعت
- 21:43
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه