اگلشوب عشقيله چون اهل ولا مسجدده
حكمراندور اودى كه مهر و وفا مسجدده
نئجه كى بحريده ماهى تاپار آرامش محض
ائله مؤمنده تاپار صدق و صفا مسجدده
بورا اللَّه ائويدى حرمتى واجبدى بيزه
كه مبادا ائلياق ذرّه خطا مسجدده
قويمياق خالى قالا، حق ائوين آباد ائليك
كه نمازى قيلاقون صبح و مسا مسجدده
نه فقط مجلس ترحيمه گلاق خلقه گوره
خوشدى آللّهه گوره بو ايش اولا مسجدده
قلبيمى غصّه سيخوب تنگه سالوب قان ائليوب
گوگلوم ايستور ائلييم ايندى بُكا مسجدده
من سؤال ايليورم اهل ولادن بو سوزى
نيه پوزقون اوتوروب شاه و گدا مسجدده؟
نَيه خاطر چكيلوبدور در و ديواره قرا
آغليور عالم معناده قرا مسجدده
قوى ديوم من سيزه اى شيعه اثنى‌عشرى
نيه خاطر قورولوب بزم عزا مسجدده
مسجده گلدى على وئردى سحر چاقى اذان
تا نمازين ائليه مردم ادا مسجدده
گلدى بير عده جماعت دوزَلوب فورى صفوف
چون جماعت نامازى اولدى به پا مسجدده ،
سجده‌دن باش گوتورنده شه مُلك دوسرا
ابن ملجم ائله‌دى جور و جفا مسجدده
ووردى شمشيرى ايكى الّى، علينون باشينا
بير بيره دگدى او دم ارض و سما مسجدده
دئدى عشقيله على: «فُزْتُ و رَبِّ الْكَبعة»
اولدى چون مقصد و منظورى روا مسجدده
گلدى جبريل امين يئر يوزينه ناله‌كنان
باشينه ووردى اوجالدى بو ندا مسجدده
اى جماعت اولون آگاه بيلون ئولدى على
ركن دين سيندى باتوب بَدر دُجا مسجدده
گورميوب گورميهجاق ديده‌ي دنيا بونا تاى
گؤر نه عزّت تاپوب اُول مير هُدا مسجدده
مسجد اللَّه ائويدى، كعبه‌ده اللَّه ائويدى
كعبه‌ده آچدى گوزين، باتدى قانا مسجدده
باشينون آخدى قانى سجدده محرابه اوَل
قتلگاه اولدى او محراب هُما مسجدده
قانلى سجّاده و تسبيحى گورن آغلادى قان
اوجالوب عرشه چيخوب آه و نوا مسجدده
او گوزل چهره‌سى قانيله بوياندى آقانون
جلوه وئردى يوزينه خون خدا مسجدده
بسدى داى خون خدانين سوزينى سالما قلم!
گؤزومه جلوه‌لنور كرب‌وبلا مسجدده
هم على خون خدادى هم حسين بن على
بالا مقتلده باتوب قانه، آتا مسجدده
بارالها نجف و كرب‌وبلا تذكره‌سين
اهل هيئتله «بشير»ه قيل عطا مسجدده
- دوشنبه
- 23
- فروردین
- 1400
- ساعت
- 15:12
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه