بو مشامه گینه عطر گل و عنبردی گلور
شب میلادیدی یا جلوهٔ دیگردی گلور
خودِ طاهادی وَ یا شبه پیمبردی گلور
نیک منظردی گلور جدّینه بنزردی گلور
آقامون قهرمان اوغلی علی اکبردی گلور
چمن معرفته سرو رواندی بو جوان
دل اهل ادبه تاب و تواندی بو جوان
ای جوان گور نجه آزاده جواندی بو جوان
صاحب رتبه و سردوش و نشاندی بو جوان
کربلا ارتشینه نابغه افسردی گلور
نجه اکبر،قلم عاجزدی چکه شعره سوزون
آچدی شعبان آیینون اون بیری دنیایه گوزون
ائشیدن باب حسینه یتوروب فوری ئوزون
چیخدی عباس بیوردی هله دیداره دؤزون
بو مبارک بالا پیک حق داوردی گلور
اکبر اکبر نجه اکبر گل دلخواه اکبر
گورسنوب برج وفاده ائله بیل ماه اکبر
یری وار مملکت حُسنه اولا شاه اکبر
سجدیه دوشدی حسین سسلدی الله اکبر
بو دلاور ابی عبداللها دلبردی گلور
معنوی جشن تولد دوتوب انصار حسین
گلدی زهراده باشیندا نچه مین حورالعین
امّ لیلایه مبارک دئدی امّ الحسنین
سنده سسله آدینی قالمیا بوینوندا بو دین
دئنن همنام علی فاتح خیبردی گلور
اکبر اکبر نجه اکبر نوه ی پاک علی
جدّی تک واردی یوزونده جلوات ازلی
حُسن شهرتده اونون جلوه سی باغلار یوز الی
تکدی واللهی گوزللیقدا حسینون گوزلی
یوزونی اوپماقا هی فوج ملکلردی گلور
ای گؤیون قوشلاری شوق عالمی پروازه گلون
عشق بلبلّرینه سس وئرون آوازه گلون
انتظاران محرّم حرم رازه گلون
پیشمرگان ولایت هامی پیشوازه گلون
مفخر هاشمیان حافظ سنگردی گلور
گرک عشّاق آرا وارسته شناسائی اولا
هانسی گولدی بئله یاد آور زیبائی اولا
طینتی کرب و بلائی ئوزی بطحائی اولا
گل زهرادی گرک عمریده زهرائی اولا
هیجده ساله سولان بیر گل پرپردی گلور
کربلاده بو جوان مکتبینه اولدی دایاق
مرد مردانه جهاده هامیدان گئتدی قباق
اشقیا دوغرادیلار جسمینی بارماق بارماق
کربلا،ایندیدن آغوشیوی آچ ساخلا قوناق
سنه مهمان بو عزیز دل مادردی گلور
- چهارشنبه
- 5
- خرداد
- 1400
- ساعت
- 20:50
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه