ایستدی حق، جلوه لنسین طلعت زیبای عشق
غرق نور ایتدی جهانی اکبر لیلای عشق
شرق خاتمدن هویدا اولدی تا شمس جلی
چشمهء خورشیدی مات ایتدی بونون نوری، بلی
طور سینای حقیقت پرتوندن مُصطَلی
ذرّه سی حیران ایدر مین وادی سینای عشق
صورتاً پیغمبر اکرمدی نور منجلی
ایله نوریکه امامت نورینه لایق ولی
طلعت رخساری شمس آسماندان جلوه لی
ذرّه قدری نور ذاتی، مِهرِ پرتو زای عشق
وه نه طلعت ذرّه سی مین یوسف کنعانیدی
وه نه منظر ناظری حور جنان، غلمانیدی
وه نه صورت، صورت خلق آفرین یزدانیدی
گوئیا دنیایه گلمیش احمد اُول سیمای عشق
تار زلفین شرح قیلسام روزگاریم تار اولار
قیس تک مجنون اولار سرگشتهء بازار اولار
گورسه هر کیم تار زلفون عمریجه بیمار اولار
گرچه بیمار ایلر آخر ایلییَر اِحیای عشق
خِرمن مشک سیه که بدویدن پرچین دوشوب
صاق و صولدان دللری صید ایتماقا چین چین دوشوب
بو خیاله نافهء مشک و خطا و چین دوشوب
بلکه بیر نافه ویره اول آهُوی زیبای عشق
چین زلفوندن دیسم چهر خطا پرچین اولار
عطرینون بیر شمّه سیندن شامهء عالم دولار
عطر زلفی اولماسا هر سنبل و ریحان سولار
عالمه نکهت ویرور چون زلف عنبرسای عشق
وه نجه وصف ایلیوم من اول قد رعناسینی
سروه مین حسرت ویرن هر سرویدن بالاسینی
سدره لردن باج آلان اول قامت طوباسینی
بل تنزُلدور دیسم اول قامته طوبای عشق
عالم عالم وار سوزوم اول خطّ و خالیندن منیم
قلب عالم دانهء خال سیاهندن دو نیم
هاشمی خالین گورنده صاحب چشم سلیم
سویلویر یاللعجائب دیدهء بینای عشق
تیر مژگانین چکوبدور اول یل ابرو کمان
قلب عشّاق جهانی ایلیوب تیره نشان
ایعجب ایتموبدی قوم فتنه کاری باغریقان
کربلاده اونداکی اولموشدی عاشورای عشق
اولدی چون غرقه بخون اصحاب شاه تاجدار
قالمادی غیر از بنی هاشم داخی بیر عون و یار
اولدی عازم رزمگاهه اکبر والا تبار
ایستدی قورسون او چولده محشر کبرای عشق
تلّه تک مهر امامتلن گلوب بو مه جبین
یوز دوتوب درگاه حقّه خسرو دین مبین
عرض ایدوب گوندردیم ای حق رزمه بیر وجهُ المبین_
صورتیندن جلوه لنمیش صورت حُسنای عشق
خَلقاً و خُلقاً رسول خاتمه مرآتیدی
وجه وجه اللهه مین برهانیله آیاتیدی
طلعت رخساری نورِ نورِ مهرِ ذاتیدی
بو جواندور وجهِ باقی وه سنون ایمای عشق
شاهد اول ایتدیم روانه من دل آگاهیلن
بیر جوان که مشتَبَه اولموش رسواللهیلن
یاره ورسا بو جوانه کیم دل آگاهیلن
انتقام آلسون او کسدن قدرت والای عشق
بدرقه ایتدی جوانین شاه دریا دل اوزی
تلّدن اکبر اَنوب شاهین باخوب حسرت گوزی
عالم عشق و وله ده بو اولوب گویا سوزی:
گرچه جانیمسن ولیکن گیت اولاخ اِفنای عشق
گوردی ناگه لشکر دلْ ظلمتِ شوم و دنی
اولدی طالع تلّدن بر ماه روی منجلی
بیر بیره سویلوبدولر گویا گلوب ختم نبی
کیم بونیله جنگ ایده قطعاً اولار اعدای عشق
بو یلِ طالوت تن، احمدی یا یحیی گلوب؟
یا که چرخ چارمیندن مهر وش عیسی گلوب؟
یا که ذبح اوّلینه مظهر عظمی گلوب؟
یا تجلّا ایلیوبدور صُولت موسای عشق؟
آشکارادور یوزوندن آیت فتح المبین
ال آپارسا تیغه قالماز بیر نفر بیزدن یقین
لرزه ایلور هیبتیندن آسمان و هم زمین
تیتردور یکسر جهانی نعل پیل آسای عشق
یوخ که قتّال العربدور، مرگدن باک ایلیون
اوز اَلوزله جسم و جانه مسکنی خاک ایلیون
یا آچون ال ذات حقّه، رو به افلاک ایلیون
بو بلایا بلکه شامل ایتمسون اَبنای عشق
بو جوان بو هیبتیندن حیدر کرّاردور
اهل هیجا صولتیندن باد تک فرّاردور
صولتاًدور گرچه حیدر صورتاً مختاردور
یا بحق رجعت ایدوبدور احمد اول معنای عشق
سسلدی سعد اوغلی ای لشکر خطا فکر ایتمیون
مصطفی دور بو جوان یا مرتضی فکر ایتمیون
عیسیِ مریمدی موسادور و یا فکر ایتمیون
یا بیله فکر ایتمیون گلمیش بو گون یحیای عشق
بو گلستان حسینون لاله رو فرزندیدی
بوستان مصطفی نون سرو قد دلبندیدی
سرو قامتلر خِیمده بو قدین پابندیدی
تئز یخون بو سرو قدّی تا قوپا غوغای عشق
بو حسین ابن علینون روحیدور اکبردی بو
خلقت پیغمبره مرآت اولان پیکردی بو
صورتاً عیناً پیمبر صولتاً حیدردی بو
اُلدورون بو هاشمنی تا یاتا بلوای عشق
غرق حیرت لشکر کین، دوردی اکبر مثل شیر
ایلدی پند و نصیحت لشکری چون فرد پیر
آندیروب اَنساینی هر فرد فردین بیر به بیر
بُلسون عالم بو جوانه کیمسه دور آبای عشق
ایتدی فرمایش بُلون ای لشکر کینه شعار
من علی ابن حسین ابن علیّ ِ نامدار
صورت وجهُ اللَّهم نَجلِ نبیّ ِ تاجدار
اول نبی که سیر ایدوبدور لیلةُ الاِسرای عشق
منده شبه احمدم بو فرقیلن ای قوم کین
قاب قوسینه عروج ایلوبدی ختم المرسلین
قاب قوسمدور منیم اما که غبرای زمین
قتلگاهیم گوسترور هر دمده اَو اَدنای عشق
بیز بنی هاشم تماماً مرد جنگوخ فرد فرد
رزمیمیزده تاب ایدنمز بیر قوشون نامرد، مرد
قانلاروزلا ایلرم صحرانی بیر دریای وَرد
بُلسون عالم بیزلروخ سردار بی همتای عشق
گلمیشم میدانه لشکر تا شجاعت گوسترم
شور قامتلن بو چولده مین قیامت گوسترم
عالمینه بیر رشادت بیر شهامت گوسترم_
مات و حیران ایلسون رزم اهلنی هیجای عشق
تا دیوب بو سوزلری حمله ایدوبدور لشکره
یوز قویوب شیرانه تا قلب سپاه کافره
گوئیا حیدر گیدور فتح قِلاعِ خیبره
ذوالفقار آسادی تیغی تیغِ استثنای عشق
حمله ایلوب هر طرفدن لشکره بو شیر نر
قوزانوب اول سمتدن افلاکه بانگ الحذر
گلّهء روباه تک فرّار اولوب سانسیز نفر
بیر علی اکبردی بیرده قورخولی صحرای عشق
اَندیروب هر بیر یله شمشیر آتشبارینی
ایلیوب توپراقه آغشته تن ناکارینی
پوزدی جنگی شامیانین رونق بازارینی
گوستروب تا تیغ تیزیله او گون کالای عشق
بیر شجاعت گوستروب شام اهلینه کرّار تک
عُمرلر یکسر بوکولدی صفحهء طومار تک
شامیان برباد اولوبدور لشکر کفّار تک
گوئیا خندقدی گلمیش ریح استیلای عشق
جنگ اکبر سالدی یاده لافتانون جنگینی
یاندیروبدور رعد تیغی شامیانین هنگینی
صیقل تیغی سیلوب اسلام و قرآن زنگینی
حشره تک تا عالمه حکم ایلسون فتوای عشق
سسلنوب کرّوبیان افلاکده یا مرتضی'
گل بلا صحراسینه نظّاره ایله اوغلووا
گور نجه جنگ ایلوری مردانه بو بحر بلا
سیل خون جاری ایدور شمشیر خون پالای عشق
گوردی سعد اوغلی چخوب شیرازه دن قوم فِتَن
ایلدی تدبیر جنگی ایشلدوب بیر مکر و فن
سسلدی عار اولسون ای لشکر سیزه بو ننگدن
سالدی طاقتدن سیزی تک بو یل نوپای عشق
تیریله آلات حربیله وجودون دولدورون
ای جماعت جهد ایدون گل پیکرین تئز سولدورون
ایستسز اُلسون حسین تئز بو جوانی اُلدورون
دست قدرت چون بونی ویرمیش اونا یارای عشق
(ایلدی ظلم اهلنی تحریص جنگ) اول فتنه کار
جرأته گلدی قُشون، لشکر قیتدی هر نه وار
اوخلارین قویدی کمانه ظلمیله یاغدیردیلار
اوخ الیندن اولدی شاهین سماپیمای عشق
گل وجودین ظلم الیله تیرباران ایتدیلر
شانهء گیسو کیمی تیغیله شان شان ایتدیلر
هر گلن بیر یاره ووردی پیکرین قان ایتدیلر
قان وجودندن آخوب بچدی عجب دیبای عشق
جوشه گلدی لشکر کین موج لی دریا کیمین
هاله ووردی دور ماهه لیلهء یلدا کیمین
آلدی دورین نون ده بیر نقطهء تنها کیمین
قوخموب عادل حقّدن ایتموبدوله پروای عشق
اولقدر یاره ووروب تاب و توانین آلدیلار
عاقبت گل پیکرین توپراقلار اوسته سالدیلار
بُلمورم اهل حرم گورجاق نه حاله قالدیلار
یا گورنده نیلدی لیلا کیمی شیدای عشق
توپراق اوسته میل ایدنده سویلدی بابا سلام
بو سلام آخریمدور ای امام اوغلی امام
جام کوثر الده گلمیش حضرت خیرُالانام
سنده گلسن بوردا قورّوخ مجلس شورای عشق
یار و انصار ایچره بیر سدّ گرانیدیم سنه
غیرت عشقونله سن بی اعتنا اولدون منه
غیرت عشق اولدی حاکم تا یتیشدون ایمنه
عشقوه مبهوت اولوب هر بیر ایدن سودای عشق
سنگ غیرت سندیروب گرچه بو گون آئینه وی
بو، سبب اولماز آزاتسون علقهء دیرینه وی
غیرت و حسرت چوخالدار سوز و ساز سینه وی
سرّینی بو سوزلرین بولمز مگر دانای عشق
ای (نگین) ختم ایله بسدور عشقدن سن وورما دم
عشق بیر طوفانلی دریادور که یوخدور ایله یَم
قطره دریادن دانشماز، بحردن شبنمجه نم
گر دانشسا اوز اوزون ایلر یقین رسوای عشق
سن ئوزین یاخشی بولورسن بی لیاقت فردسن
صورتاً ده مرد اولسان سیرتاً نامردسن
دلده کی منظوروی گَل ایستمه روزردسن
گرچه دوزدون دفتر اوسته لؤلؤ لالای عشق
- چهارشنبه
- 12
- خرداد
- 1400
- ساعت
- 16:20
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه