ووردولار اود خرمن ایمانه مؤمن یوخلاما
آچدیلار غارت الین قرآنه مؤمن یوخلاما
مملکتده بیر اویاق یوخدی اولوب قَحط الرِّجال
آت سالوب رَجّاله لر میدانه مؤمن یوخلاما
یوخلادون یاتدون داغیتدی اوغرولار اموالیوی
آند وئرَّم غیرت و وجدانه مؤمن یوخلاما
قاپدی قاچدی بورکووی دشمن چیخاتدی کورکووی
چولقالانما بسدی بو یورقانه مؤمن یوخلاما
ناقِصون اولسا، ئوزون تکمیل ایله تا زنده سن
آرخیین اولما قیزا اوغلانه مؤمن یوخلاما
پیرو قرآن و دین باخ گور نه حاله قالدیلار
مود اروپادن گلور ایرانه مؤمن یوخلاما
قولده مسلم ائدیر فعلاً حجابی مسخره
گونده بیر الگو گلور نسوانه مؤمن یوخلاما
قویما لامذهبلر عاشورانی عزّتدن سالا
رِخنه وورسون نیمه ی شعبانه مؤمن یوخلاما
دوست آدیلا دشمنون ایستور آپارسین دینیوی
یار نقشینده گزیر بیگانه مؤمن یوخلاما
قویما فرهنگ اروپا یول تاپا فرهنگووه
دین و ملیّت اولا افسانه مؤمن یوخلاما
قاره کوینکلردی پرچملردی دینی ساخلیان
مُنکر اولما شیون و افغانه مؤمن یوخلاما
گزمه دکترلر مطبّین ایلمه خواهش دوا
گل حسین دربارینه درمانه مؤمن یوخلاما
دشمن ایستور بو قرا کوینکلری بیزدن آلا
مُتّکیدی مختلف عنوانه مؤمن یوخلاما
بیرده گَرنش سن اولار یکسر مساجد سینما
رستورانلار کافّه لر میخانه مؤمن یوخلاما
اجنبی لر اعتقادوندن سنی سُست ائتماقا
قاتدیلار تار دونبگی قرآنه مؤمن یوخلاما
شیعه سن گر هر نه یون واردی حسیندندور سنون
تابع اولما آل بوسفیانه مؤمن یوخلاما
چوخلار ایستور، ائتماقا ترویج وهّابیّتی
قفل وورسون مکتب عرفانه مؤمن یوخلاما
بعضی بی غیرت، حسینون ماتمین بدعت بیلور
دل آچور هر بزمده هذیانه مؤمن یوخلاما
گئت حسینون خطّ سرخین قوخما گمراه اولماسان
دوت بو خطّی گئت یئتیش رضوانه مؤمن یوخلاما
وئرمه الگو ناقلایه باادب گل مجلسه
نُکته بین اُول عارف فرزانه مؤمن یوخلاما
وور باشا وور سینه‌یه ناله‌ون اوجالسین گویلره
قوی سنه جاهل دئسین دیوانه مؤمن یوخولاما
شیعیه خاطر گئچوب جاه و جلالیندن حسین
درس بیداری وئروب انسانه مؤمن یوخلاما
حق یولوندا آلتی آیلیق صودامر مهپاره سین
وئردی قربان ناوک پیکانه مؤمن یوخلاما
دینه خاطر عترتیندن عزّتیندن ال چکوب
یار و انصاری بویاندی قانه مؤمن یوخلاما
هاردا بیر شمع عزا یانسا حسینون آدینا
اول او شمعین باشینه پروانه مؤمن یوخلاما
یان ولایت عشقینه پردن گئچن پروانه تک
یان حسینه یانماسان نیرانه مؤمن یوخلاما
من بکا و اَو تباکانی «کریمی‌دن» سوروش
گوز یاشون توک ابر تک دامانه مؤمن یوخلاما
- چهارشنبه
- 5
- خرداد
- 1400
- ساعت
- 22:4
- نوشته شده توسط
- یوسف اکبری
ارسال دیدگاه