نهر علقمي گورسم دیرم قان اولاسان سو
يانسين اورگون آتش سوزان اولاسان سو
بير دفعه سنه باب الحوائج يولي دوشدي
سقّا ال اوزاتدي سنه وُردون قولی دوشدي
صاق صول يارالاندي صاقي دوشدي صولي دوشدي
عباس تک عمرونده پشیمان اولاسان سو
بس کیم وئره جاق اصغرين عقباده جوابين
سخت ايله خدا حرمله نین درد و عذابين
بير شوربه سویا گوزياشي قان اولدي ربابين
گوز ياشي کيمي قانيله الوان اولاسان سو
دریا کيمي آخدون چوله جوشان و خروشان
قالدي علی اولادي حسین قزلاري عطشان
اصغر دوداقين امدي رقيّه ائدوب افغان
زینب کيمي احوالي پريشان اولاسان سو
بير مشگ سو دریا کيمي نهر علقمه نيلر
سقّا باخا اصغرده دوداقين امه نيلر
يوزمين قوشون ال تاپسا او جا پرچمه نيلر
دائم یوزی قاره گوزي گریان اولاسان سو
بير تیر سه شعبه دگه آلتي آيليق اوشاقدان
بير اوخ که ابوالفضلي يخوب سالدي اياقدان
خنجر کيمي بيچدي بو قولاقدان او قولاقدان
دائم هدف طعنهٔ عمّان اولاسان سو
بير اوخ که گلوب دگدي ابوالفضل گوزوندن
بير دگمه ده نومید ائدوب عباسی اوزوندن
ال اولمادي سيلسين او آخان قاني يوزوندن
باخدي دئدي مشگيم کيمي گریان اولاسان سو
سقّا سوسوز ئولدي ايکي نهرين آراسيندا
گئتدوخجا سو قالدي گوزي مشگين پاراسيندا
قان لخته لنوب سوز عطشدن ياراسيندا
حیران آخيسان چوللره حیران اولاسان سو
عباسی نه دن اهل شقاوت يولا وئرمز
بير مشگ سو ايستور آلا بير جوت قولا وئرمز
ساخلار علمی قويسالا صاقدان صولا وئرمز
رحم ائتمدون عطشانلارا عطشان اولاسان سو
ايستکلي رقيّه م ائدير افغان سوسوزوندان
گهواره دن اصغر وئروري جان سوسوزوندان
اطفالين اولوب حالی پریشان سوسوزوندان
شایسته دی جوشان و خروشان اولاسان سو
قول دوشدي علم ياتدي تلاشيم هدر اولدي
بير اوخ دا دگوب مشگه گوزومدن بتر اولدي
نوفل بير عموديله منه حمله ور اولدي
دنیا بويي شرمندهٔ دوران اولاسان سو
یول سالسا کریمی گینه صحرای بلايه
نهر علقمي گورسه ائدر آغاز گلایه
بير مشگ سویا سالدون ابوالفضلي بلايه
يانسين اورگون آتش سوزان اولاسان سو
- یکشنبه
- 9
- خرداد
- 1400
- ساعت
- 17:56
- نوشته شده توسط
- یوسف اکبری
ارسال دیدگاه