حضرت پیغمبره ویرّم قسم حارث سنی
گل محمّد قارداشیمدان اَل گوتور ئولدور منی
گل ترحّم ایت منیم قان ایلمه گوزیاشیمی
رحمون اولسون ای شقی ئولدورمه بو قارداشیمی
قارداشمدان گل قاباق ظالم منیم کس باشیمی
گل محمّد قارداشیمدان اَل گوتور ئولدور منی
چوخ اونا غیظیله باخما قورخور ای شوم دنی
ئولدورورسن ایمدی که سن ای قساوت معدنی
یوخ سوزوم ئولدور ولی اوندان قاباق ئولدور منی
گل محمّد قارداشیمدان اَل گوتور ئولدور منی
اوز ایوینده ئولدورورسن اوز قوناقون یوخ سوزوم
قارداشیم ئولسون قاباقیمده نجه بس من دوزوم
قارداشین قانه باتان نعشین نجه گورسون گوزوم
گل محمّد قارداشیمدان اَل گوتور ئولدور منی
بیز غریبوخ گرچه ظالم مسلمون اطفالیوخ
بیز آنامیز وار اونون دلدن پریشان حالیوخ
ئولدورورسن بیزلری آخر بو ایشدن حالیوخ
گل محمّد قارداشیمدان اَل گوتور ئولدور منی
من دیمم ئولدورمه ظالم رحم ایله بو بی کسه
یوخ گمانیم گیتماقا داده بو یرده بیر کسه
قارداشین اولماز یانندا باشینی دشمن کسه
گل محمّد قارداشیمدان اَل گوتور ئولدور منی
یوخدی گرچه سنده هیچ رحم و مروّتدن اثر
قارداشیم گور مرغ بسمل تک نجه تترر اَسر
قارداشین یانندا کیم قارداشینون باشین کسر
گل محمّد قارداشیمدان اَل گوتور ئولدور منی
ایلیوبدی جسمیوه چون روح شیطانی حلول
هر نه خواهش ایلروخ ردّ ایلوسن خصم رسول
ایمدی گل بیر لامحاله بو سوزی ایله قبول
گل محمّد قارداشیمدان اَل گوتور ئولدور منی
اولموشوق مدتدی ظالم بیز وطن آواره سی
دوشموشوق بیر ایله بیر درده تاپولماز چاره سی
وورما ایمدی قلبیمه سن باری قارداش یاره سی
گل محمّد قارداشیمدان اَل گوتور ئولدور منی
عمرونون شمعین دیمم بو گونده خاموش ایلمه
حکم ایدر الله آرامیزدا فراموش ایلمه
باری گل قارداش فراقینه منی توش ایلمه
گل محمّد قارداشیمدان اَل گوتور ئولدور منی
کافر ئولدورمز قوناقین اوز ایوینده رحم ایله
قویماز آهیم نخل امّیدون یتیشسین حاصله
میزبان بو نوع رفتار ایلمز مهمانیله
گل محمّد قارداشیمدان اَل گوتور ئولدور منی
- دوشنبه
- 10
- خرداد
- 1400
- ساعت
- 15:2
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه