اوگونكه كوفه ی ویراندا مسلم بن عقیل
بویاندی قانینه كفار اَلینده اولدی قتیل
ایكی یتیمینی ابن زیاد ایدوب محبوس
اولوبلا غمله او زنداندا مدتی مأنوس
نه بیر انیس و نه مونس، نه هم زبان واریدی
نه بر تسلی ویرن یار مهربان واریدی
قوجاقلاشوردولا، آغلاردیلار او زنداندا
دوشردی هر بیری بی حال اولوردی بیر یاندا
ایدردیله گنه ناله گَلَن زمان حاله
اولوردولار ایکی قارداش مدام هم ناله
زبسکه چکدیله درد و بلا، بلاکش لر
ضعیف اولدولا مثل هلال او مهوش لر
مقام گوشه ی زندان صغیر و شهزاده
سیزیلداشیردیلا نی تک گَلوردولر داده
گَلنده بیرگونی زندانه پیر زندانبان
او شاهزالده لر احوالی ایلیوبلر بیان
او پیر پاک نهادین دوتوبلا دامانین
ایدوبله دللرینون کشف راز پنهانین
توکوبله گُل یوزه گوزیاشلارینی همواره
گلوبله خواه نخواهی بو نوعی گفتاره
بیزه ترحّم ایله، زار و بینوایوخ بیز
غریب و بی کس و بی یار و مبتلایوخ بیز
سولوبدی گل یوزوموز بسکه واردی محنتیمیز
یتر پیمبر آخِرُ الزَّمانه نسبتیمیز
بو ذلت و ستم و ظلمه بیز روا دگلوخ
بوقدر بی گنهوخ لایق جفا دگلوخ
بیزه محبت ایله سود وار محبتده
سنه ایدر عوضین فاطمه قیامتده
بو قدر بُل که سنون خدمتون هدر گیتمز
قیامتین گونی ایتامه یاخشیلیق گیتمز
مدینه ده آنامیز وار یولوموزی گوزلر
تیکوب یولا گوزینی روز و شب فغان ایلر
اوپیر چونکه محب شه ولایتیدی
دلنده مهر علی اصلی پاک فطرتیدی
کیمه گیدر اولارین نسبتی اونی قاندی
دوشوب وجودینه رعشه اورکدن اودلاندی
دولاندی باشلارینا بیر مثال پروانه
اوزینی شوقیله یاندوردی شمع سوزانه
قویوب قدملرینه آه و زاریلن یوزونی
شه آستانی بُلوب خاکسار ایدوب اوزینی
دیدی گذشت ایلیون یوخدی هیچ خطا منده
بو غفلتیم منی سیزدن ایدوبدی شرمنده
قسم اولا او رسوله که نسبتوز یتیشور
منه اُلونجه سیزون بو خجالتوز یتیشور
سیزی اگر تانییدیم خلاص ایدردیم من
آتام آنام سیزه قربان داخی اولون ایمن
قصاص ابن زیاده بوگون قصاص ایدرم
بو قدر آغلامیون من سیزی خلاص ایدرم
غرض اوگون توکنوب گون باتوب اولوبدور شام
دوتوبدی پرده ظلمات شرق و غربی تمام
ای پیرمرد ایلیوب روح مسلمی چوخ شاد
ایدوب یتیملرین قید بندیدن آزاد
کبوتران حرم چخدی دام ظلمتدن
نه حالتیله، بدن تیترشوردی وحشتدن
دولاندولار او گئجه وحشتیله سرگردان
ایتوردولر یولی، اولدی سحر، قالوب حیران
دوباره ظلمین عیان چرخ کجمدار ایلدی
دولاندوروب اولاری حارثه دچار ایلدی
داخی چوخ ایستمورم صحبتیمده طول اولسون
اشاره بَسدی که حضّار دی ملول اولسون
او شاهزاده لری هاردا تاپدی اول بی دین
بُلولّه اهل خبر چون تمام تفصیلین
یتیم اوشاق، غم غربت، صغیر و بی تقصیر
اولوبلا حارث شوم و شریر اَلینده اسیر
عنادیلن گهی قمچی ووروب گهی سیلی
بنفشه تک گویَروب یوزلری، اولوب نیلی
شقاوتی او شقی نون ایدوب دمادم جوش
خیال ایدوب ایده مسلم چراغینی خاموش
ویروب غلامینه اوز خنجرین او شوم دنی
دیدی یتور بولاری قتله، ایله راضی منی
غلام آلوب اَلینه خنجری، اولوب عازم
او شاهزاده لرون قتلینی بُلوب لازم
گورنده قاتلی مقتوللر برابرده
ایدوبله نی کیمی ناله، گَلوبدولر درده
بویوردولار او غلامه، غلام سن کیمسن
بلالِ حضرت ختمِ رسوله بنزورسن
ایشیتدی چون او جوان ختم مرسلین اسمین
اورک دوگوندی، دوتوب لرزه سر به سر جسمین
بویوردولار که رسول خدایه منسوبوخ
او خانواده ی والاده خیلی محبوبوخ
خطاب ایدوب سیزه قربان اولوم، مگر کیمسوز
ویرورسوز اشرف مخلوقیدن خبر، کیمسوز
بو قدر بُل که بیزوخ مسلمین یتیملری
بیله بلایه دوشر گور کیمون یتیم لری
بو سوزلری ایشیدوب اول جوان پاک نهاد
اَلیندن آتدی یره خنجری، چکوب فریاد
خطاب حارثه قیلدی که دوت منی معذور
محالیدور ایلیم من پیمبری مقهور
منیم جهاندا یوزوم قارده دور نظرلرده
علاوه ایتمه منی رو سیاه محشرده
غضبلَنوب او ستمگر بو حالی چون گوردی
گوتوردی خنجری یردن اوز اوغلونا وِیردی
دیدی دایانما آپار سن بولاری قتله یتور
هر ایکیسین یتوروب قتله، باشلارینی گَتور
گورنده حارثون اوز عورتی بو احوالی
گَلوب فغانه، پوزولدی بو حالیدن حالی
دیدی اماندی اوغول ایتمه بو ایشه اقدام
اوزیوی ایلمه دنیاده خلق آرا بدنام
خیاله محشری سال ایلمه بو امری قبول
خجالت ایتمه منی فاطمه یانندا اوغول
یِتَر سنون بو ایشون خجلتی جزاده منه
سودیمی منده اوغول ایتمرم حلال سنه
گوروب آناسینی بو حال زاریلن او جوان
دوتوب آنا سوزینی، آتدی خنجری او زمان
دولاندوروب آتاسیندان یوزین، کناره گیدوب
چکوبدی محشر اودوندان اوزین کناره، گیدوب
دوباره غیظه بو احوالیدن گَلوب حارث
خیال ایدوب بو ایشی، اوز ایشی بُلوب حارث
بو امره ایلدی اقدام اوزی او شومِ شرور
او شاهزاده لرون قتلینه اولوب مامور
او شاهزاده لری بیرده خنجرین گوتوروب
تمام غیظیله شطّین کنارینه گَتوروب
گوروبله یوخدی او بیچاره لر داخی چاره
مقام عجزیدی، یالواردیلار او غدّاره
ایدوبله هر نچه تکلیف او شوم اوچون اظهار
قبول ایلمیوب هر چه ایتدیلر اصرار
آلوب اجازه او شهزاده لر نمازه دوروب
حضور قلبیله درگاه بی نیازه دوروب
قویوبلا باشلارینی سجده ی مناجاته
ایدوبله عرض لرین کافیُ المُهِمّاته
کریم و دادگر عادل و رحیم الله
اوزون بو بارده ده حکم ایله ای حکیم الله
ایدردی راز و نیاز اول غریب و بی کسلر
مجال ویرمدی حارث، آلوب اَله خنجر
اَل آتدی زلف سریندن یاپوشدی بیر دسته
کسوب باشینی بیوک قارداشین نماز اوسته
گورنده قارداشی مقتول، خرده جه قارداش
دولاندی نعشینون اطرافینه توکوب قانیاش
قوجاقلیوبدی او باشسیز جنازه سین یرده
گَلوب فغانه، گَتوردی پیمبری درده
دیدی که سندن ازل قارداشون اُلیدی کاش
توقّف ایله، دایان، منده تا گَلیم قارداش
دوباره حارث بی دین جهانی یاندوردی
او خرده قارداشیدا قانینه بویاندوردی
توکوبدی فاطمه نون ظلم اَلیله گوزیاشینی
کسوبدی قارداشین اوستونده قارداشین باشینی
گوتوردی نعشلرین شطّه اول شقی آتدی
او نعشلر دوشوب ازلّده بیر سویا باتدی
باتوب چخوب یوزه، قانیله سو یوزی دولدی
سویون یوزینده ایکی نعش قول بویون اولدی
قراریمی بو ایکی قارداشین غمی آلدی
حسین بی کس و عبّاسی یادیمه سالدی
او گونده قتلگه کربلاده قان داشدی
او وقته بو ایکی قارداشدا بیر قوجاقلاشدی
قولی اولیدی ابوالفضلین اول زمان ای کاش
سالدیدی بیر بیرینون بوینونا ایکی قارداش
بو نسگل عقده سی قالدی گوگلده عبّاسون
سالیدی بوینونا قول بیر او زُبده ی ناسون
بو شرح غم رفقادن (شهاب) اولوب تاکید
ولیک اوزلریده ایلیوبدولر تایید
همین بو قدر کفایتدی شرح محنت اوچون
اگر قبول اولا چوخ توشه دور شفاعت اوچون
- جمعه
- 5
- شهریور
- 1400
- ساعت
- 11:51
- نوشته شده توسط
- یوسف اکبری
ارسال دیدگاه