فرق قویماز ای بشر پیر و جوانه آیریلیق
اود سالار گر دوشسه هر بیر دودمانه آیریلیق
پنجه سیندن بیر نفر اولماز سلامت قورتارا
بیلمیوب بیلمز ندور هرگز بهانه آیریلیق
رستم دستانلاری بیر لحظه ده ایلر شکار
تیر زهرآلودینی قویسا کمانه آیریلیق
پهلوان اولسون یاتیردار سعی ایله من من دیمه
تنگ ایدیبدور عالمی هر پهلوانه آیریلیق
یاخچی باخسون زندگی مثل نمایش نامه دی
باخماز اوردا تا ابد سود و زیانه آیریلیق
هرکسه بیر نقش ویرمیش کارگردان ازل
نقش قورتارجاق چکر بیرآندا کانه آیریلیق
فکر باطلدور دیسون دنیانی من ترک ایتمرم
سنله سایون تک گزور شانه به شانه آیریلیق
مال دنیایه منیم دل باغلیانناندور سوزوم
گتدی قارون تک شهی دنیاده جانه آیریلیق
عالمین گنجی اونون گنجینه سیندیدی ولی
ایتدی بایقوش تک، او یرده آشیانه آیریلیق
قصری اولموشدی اونون ورد زبان عام و خاص
ایلدی تبدیل بیر ویران مکانه آیریلیق
جوخلارین گوردوم اوزون دنیاده جاویدان بیلور
هامیدان اوّل اونی ایتدی نشانه آیریلیق
تا نفس وار سعی ایله اولما اسیر نفس دون
چونکی حاکمدور زمین و آسمانه آیریلیق
بیرگونی گوردون سنونده باغلادی پرونده وی
ایلدی تقدیم دست بایگانه آیریلیق
اوندا چاتماز دادیوه مال و منال دنیوی
اعتنا ایتمز منال بیکرانه آیریلیق
هرنه اندازه چاغیرسان بیر یره چاتماز سسون
دوندرر گوز یاشیوی بیر گونده قانه آیریلیق
آیریلیقدان بوردا منظوریم ئولومدور والسلام
رحم قیلماز باتوان و ناتوانه آیریلیق
کیمدور آیا نوحیجه دنیاده چوخ عمر ایلین
هامیدان چوخ نوحی چکدی امتحانه آیریلیق
چوخلاری فکر ایلیوردی عمر جاویدانی وار
خط بطلان چکدی عمر جاودانه آیریلیق
تیره تپراقه (سرابی) باش قویار آخر هامی
باخماز اوندا شان سلطان و شبانه آیریلیق
- سه شنبه
- 11
- خرداد
- 1400
- ساعت
- 16:11
- نوشته شده توسط
- یوسف اکبری
- شاعر:
-
اصغر سرابی
ارسال دیدگاه