السلام ای رهبر محبوب دوران یاعلی
السلام ای ناطق پرشور قرآن یاعلی
یاعلی ای حضرت حقین منزّه بنده سی
ای اولان عرش خدانین اختر تابنده سی
ای وئرن اسلامه قیمت همت ارزنده سی
سنسیز اولسایدی ایتَردی عترتین پرونده‌سی
امتی قان آغلاداردی قوم دونان یاعلی
وقروه صد مرحبا مکر عدویه اویمادون
جامه‌ی عشقی کی گیمیشدون ئولونجه سویمادون
عشقوه جانلار فدا حق جبهه سین بوش قویمادون
هرندن دویدون ولی عشق ولادن دویمادون
ایلدی عشقون سنی دنیایه سلطان یاعلی
پرچم عدلی جهاندا سن سر افراز ایلدون
راه عشقی عشقیله اهل دله باز ایلدون
شیعه لر یکسر سنه٬سن خالقه ناز ایلدون
آسمان عشقیده قوش مثلی پرواز ایلدون
اولدون ئوز معبودوه گوگلرده مهمان یاعلی
خاتم مرسل سنه دائم ائدردی افتخار
سویلیردی سنده کاملدور شعورو اقتدار
یوخ سنه همتا جهاندا ای شه دُلدُل سوار
شیر یزدانسان سنی تائید ائدوب پروردگار
ایلیوب یکسر امیر کون و امکامن یاعلی
چونکی عشق خالق منان سنون قانونده دی
حقه یار اولماق ازلدن ذات و بنیانونده دی
مهر حی لم یزل دائم دل و جانونده دی
عالم هستی همیشه تحت فرمانونده دی
ایسته سون دنیا اولار بیر آندا ویران یاعلی
هر کسین مقصودی عالمده اگر الله اولا
آللاها خاطر گرک هم عهد آل الله اولا
مطمئنم رمز عشقه هر بشر آگاه اولا
ایلینمز غیر سن بیرشخصه خاطر خواه اولا
سنسیز هر عشقه چکر بیر خط بطلان یاعلی
سن وروبسن عالمه‌حق حقیقیت درسینی
اورگنوب علامه لرسندن شریعت درسینی
قاضیلر سندن آلوب مولا قضاوت درسینی
اخذ ائدوب سندن عدالت گر عدالت درسینی
باغلیوبدور حق سوینلر سنله پیمان یا علی
گرچه پیمان غدیری چوخلاری سیندردیلار
رشتهٔ پیمانلارین بعد پیمبر قیردیلار
دختر پیغمبره ظلمیله سیلی ویردیلار
قوردولار دام بلا پرگاهوی یاندیردیلار
ساخلادی بیر عده پیمان با دل‌وجان یاعلی
عهدینه قیلدی وفا بیر عده‌لر عمار تک
حفط ائدوبدور ارزش مولاسینی اسرارتک
حافظ اولدی حق مولادن یانان دربار تک
ئوز سوزی اوسته دایاندی میثم تمّار تک
وئردی عشقونده سنون ایثاریله جان یاعلی
حُسنیوین تعریفین ائتسم اهل دل حیران اولار
گر دئسم زیبا جمالوندن اورکلر قان اولار
سیره گر چیخسون گجه‌دالدوندا آی پنهان اولار
نوروی سالسون گونوز گون‌گویده سرگردان اولار
تابشوندن شرم ائدر خورشید تابان یاعلی
ذولفقاروندن دانیشسام شور دیگر خلق اولار
چکسه‌سوز‌میدان‌جنگه‌آیری محشر خلق اولار
ایستسه الله اگر هرگون مین افسر خلق اولار
هاردان اما بیرده بو دنیاده حیدر خلق اولار
بهر رحمتده اولان ای دُرّ رحمان یاعلی
وصفوی مولا گرک عباس نام آور دئسون
یا زشید اوغلون حسن یا شخص پیغمبر دئسون
یا عزیز اوغلون حسین تعریفوی ازبر دئسون
یوخ گنه سهو ایلدیم باید خود داور دئسون
تا اولونسون ارزشون خلقه نمایان یاعلی
قدروی افسوس اولا نادان عربلر بیلمدی
جایگاهون هاردادی اول بی ادبلر بیلمدی
معنی والـیـنـی هرگز بـولـهـب لـر بیلمدی
سن‌نه ایش گوردون او بی اصل و نسبلر بیلمدی
نقشه‌چکدی‌تاسنی‌ئولدورسون عدوان یاعلی
گوزلریم قربان علی جان قان اولان گوز یاشوه
وئرسلع ملک‌جنان کمدور سنون پاداشوه
فرق قویمازدون قضاوتده غریبله تنی قارداشوه
ابن ملجم اندیرنده تیغ ظلمی باشوه
آدوی ذکر ایلدی اول خصم سبحان یاعلی
ایلدون چونکی همایت مکتب اسلامیدن
حقی باطلدن آیردون شیعه نی شیطانیدن
سنگر اسلامه خاطر چیخمادون میدانیدن
رتبه‌ٔ عظمانی آلدون خالق منّانیدن
الدون آللهین ولی سی شاه مردان یاعلی
نشر اولوب تا شهریارین ای همای رحمتی
گون کیمی اولدی عیان دنیاده شان و شوکتی
مورد تائیدون اولسا بو حقیرین زحمتی
بیر نظر قیل تا سرابینون اوجالسین همتی
شهریار تک ائله مشهور خوبان یاعلی
- چهارشنبه
- 12
- خرداد
- 1400
- ساعت
- 11:15
- نوشته شده توسط
- یوسف اکبری
- شاعر:
-
اصغر سرابی
ارسال دیدگاه