سرمه لی شهلا باخشلی بیر نگار ایستر کونول
بدنظرلر آفتین اوندان کنار ایستر کونول
لعلِ لب، زیبا باخیش، چاه زنخ، زلف پریش
حسنونون مجموعه سیندن هرنه وار ایستر کونول
لیلی مجنونه ووران بندین سیاقنده مدام
ایله بیر زلف کمند تابدار ایستر کونول
ماه وش شاهین جلالین شوکتین، اول دولتین
وار نقدری تخت سلطان، برقرار ایستر کونول
یاندروب عاشقلرین عشقین شرارینده، ولیک
مجمر عشقین دمادم شعله بار ایستر کونول
اختیاریلن آخانماز گوز یاشی هیچ بیر کسین
اول سببدن آغلاماق بی اختیار ایستر کونول
قلبیمون باشی یانار، یاندوقجا گوزیاشیم آخار
تا آخار، بو گوز بولاقین دجله وار ایستر کونول
ای نگاریم نازلی شاهیم سائلم باش چک منه
وصلوون مشتاقیم، روز قرار ایستر کونول
بش گون اولدی دهریده تخت سلیمان حشمتی
سن کیمین شاهی ولیکن پایدار ایستر کونول
گل (نگین) گنجینیه اَل وورما گیزلت دُرّوی
گرچه هر دم خامه وی گوهرنثار ایستر کونول
- چهارشنبه
- 12
- خرداد
- 1400
- ساعت
- 17:21
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه